انا وكليتي والاجر على الله!!!(1)

دي شويه حااجات ومواقف فالكلية واللي فيها........رحمتك يااااااااارب هي هتبقى ملخبطه ومش مترتبه باوقات معينه غالبا عشان انا بكتبهم الصبح بدري مش هكون فااايق يعني طب وانت ايه اللي مصحيك بدري يا كريزي باشا يا تنك ؟!؟!.... اه سؤال جااااااامد يا راجل...بص اول موقف هيفسرلك انا صاحي بدري ليه........

..................................

كوكو واوا كوكو واوا....
.دي اول كلمة جت على لساني لما المغربي(الي بيسافر معايا مش كل شويه هنقول افهموا بقا!!) اتصل بيا عالتلفون الارضي الساعه 6 الصبح وبيقولي يا بني دا السبت لغينا المحاضرات اللي فيه ومباقش فيه حاجه فعشااااااااان كده مش هنسافر الصبح بقى ونسافر بكره الاحد ولا حاجه......
قلتله ده ليه؟!؟! قالي ليه ايه عادي اتلغت وخلاص.....طيب يا مغربي وقفلت...... وكوكو وااااوا كوكو واااوا كوكو واااااوا

..................................

(يااااادي القرف....ارحمني يارب!!!)
دي كانت اول كلمة نطقتها لما ماما دخلت الاوضه وعماله تصحيني...قوم يابني قوم يلا عشان تلحق تسافر والمنبه اللذيذ عمال يرن ام الرنه الغبيه بتاعته دي تيت تيت تيتتت تيت....
ومش طايل اسكته طبعا دا كان اول يوم فالسنه الدراسيه الجميييييييييله (جدا جدا جداااااا)
لحد دلوقتي مستغرب اني قلت الكلمة دي اول ما فتحت عيني اصلها سبحااااااان الله طلعت عالمقاس بتاع السنه اللوز دي من اولها المهم......
صحينا وجهزنا نفسنا وخرجنا

ومتسألش ليه....
تخرج فمدينة مفيهاش حد بيتحرك قبل الساعه 8 الصبح وبالعااااافيه
والمفروض سعتك تروح لموقف الاتوبيس اللي فااااااخر المدينة عشان تلحق الاتوبيس بدري
ومتسألش ليه.....

الاخوه الافااااضل بتوع المحطة كيف عندهم يطلعوا معاد الصبح ف6 الصبح والدنيا فيها برد يقولك هنطلع اتوبيس مكيف
يعني كتر خيرهم مبيزنقش معاهم يطلعوا الاتوبيس بتكييف الا فالبرد لزوم الدفا بقا واللذي منه.....

يا اخي كفايه اقولك انهم مبيطلعهوش فالصيف واول ما يبدا الشتا
يفتكروا ان في اتوبيسات مكيفه فيقولك الحق طالعها ياعم نلم شويه فلوس من الناس دي
طبعا على اساس ان مفيش كلب من الناس هيفتح بقه ويقول لا مش هركب الاتوبيس ده
واهو والله عندهم حق كله زي الكلب(اااااه كلب بقى) بيروح يدفع تمن التذكره ب7 جنيه
ويركب الاتوبيس وهو عمال يبرطم فبقه وعاملي غضبان ومش عاجبه حال البلد ويقعد يلقح بكام كلمة زي وشه المعفن وكانه كده ياعيني مجبر ومش فايده يعمل حاجه
وهو كلب راضي باللقمه اللي تترميله وبعدين يقعد ينبح لوحده عشان مش عاجباه
بس ميقدرش يقول لا اصله جبان وديله لازق فالارض على طول...
ويطلع يقولك اصل المصريي عالم... ومش عارف ....
كانه جاي من المريخ زياره وهو البريستيج والباقي غلط
انا البشر الكلاب دوووول اكتر حاجه بكرهها مهو يا تكلم وتدافع عن اللي شايفه حقك وتحاول يا تحط لسانك جوه بقك وتسكت ومتوجعش دماغنا بكلام زي وشك....

حتى انا فاكر يوميها كنت واقف فالطابور وكنت طبعا ساكت عشان مبحبش يوم السفر ده
طلع حد كده الله اعلم منين عمال يزعق ويقول ان اللي قدام بيقطعوا تذاكر كتير لناس تانيه وان ده مينفعش وميصحش وعيب
حقه صح؟!؟!؟!؟
بس تقول ايه بقى لما تعرف ان سعته بيتكلم على الوضع اللي بيكون فيه كام زميل راحين الكلية سوا
وبيوقفوا اتنين تلاته منهم وهما اللي يقطعولهم....
يعني بالبلدي بدل ما يقف 6 بني ادمين مثلا فالطابور واحد منهم بيقف ولا اتنين وهما اللي بيقطعوا حسب الوضع
اوقات اللي بيقطع التذاكر يقولك انا اخري اقطع 4 تذاكر للفرد او 3 فيطروا يوقفوا اتنين منهم كده يعني.....
فانا بصيت للراجل ده
وبقوله ((حضرتك دول مبيدوش تذاكر لحد تاني دول مجموعه مع بعضهم وهما لو بيجيبوا تذاكر لناس كده وخلاص مكناش هنسمحلهم بس دول ناس مع بعض ))
فالاخ قام معلي صوته(ده على اساس انه بيحرج حد يعني!!) ويقولك ازاي يعني انا ادي تذكره للي معايا وهو اللي يجبني وانا ما اقفش يعني ما كل واحد يقف فدوره يا جماعه وبلاش الي بيحصل ده
قلتله((حضرتك مفيش حاجه بتحصل الناس بدل ما توقف طابور طويل عالفاضي لموا من نفسهم عشان ينجزوا وميطولوش الوقت عالفاضي))
((لا ياعم كل واحد يقف فدوره))
((يعني عايزهم يقف كل واحد فدوره ...ما هي هي واحد واقف وماسك الفلوس للناس دي....وهي هتفرق ايه يعني واحد يقف ولا المجموعه كلها....ما كده كده التذاكر هتطقطع وانت كده كده مش هتركب الاتوبيس))....

بعدين جه المغربي وقالي خلاص يا احمد كفايه ملكش دعوه ووقف جنبي وعمال يكلمني عشان نبطل رغي مع البني ادم ...ده وخلاص

..................................

(ياختي كاميييييله!!)
والله ما كان قصدي اتريق او اسخر للدرجادي منها
بس الكلمة طلعت مني غلط والله يوميها واحنا فالموقف اول يوم بقى
والبنات الجدد فالكليات لسه راحين وواقفين بقى مع البنات اللي اكبر منهم شغااااالين رغي معاهم
.........دودودوددودودودودودو..........
عمااااالين يسألوا كل شويه عن الكلية والنظام فيها والدكتور الفولاني والاخ العلاني ومش عارف الكتب ايه؟! ولا المكان ايه؟!؟! وهكذا يعني المشكله بقى انهم كانو كتيييييير كانوا بنات كتير اوي
وعمالين طالعين نازلين رغي
واحنا الصبح وواقفين مستنين الغندور بتاع شباك التذاكر
يتكرم ويتعطف ويتناااازل ويفتح الشباك عشان يقطعلنا تذكرة الرحمة والنجاه من النار(اللي تكون نصيب اي غبي فالدنيا دي)
الا وتلاقيلك الاخت اللطيفه دي طلعت بالسؤال الغرررريب ده...

((هو في جنينه فالكلية نقعد فيها فالبريك!!!))

وطبعا بصوتها الناااعم بقا الهاااادي اللي فيه ريحة ثانوي لسه اول ما سمعت السؤال ده.....
((يااااااااااااااختي كمييييييييله)) وطلعت بصوت عااااااالي.....

واذ فجأةً.....بصولي كلهم كده باستعجاب......
انا معملتش حاجه اساسا....بصيتلهو وابتسمت ببلاها(مش بتتقال كده بردك؟!؟!)
وسكت وبس قعدوا بيهمسوا حبه مع بعض كده (مش عااارف هو مش ده موقف في فيلم؟!؟!؟)

وبعدين رجعوا يرغوا تااااااني

دودودودودودودوودودودودودودودود.........
..................................

كفايا كده.........انا هقوم اسافر.......

ربنا يسهل......نكمل الاسبوع القادم............

بس قبل ما نمشي ...شوف الصوره دي دي لوحة كليتنا الجليله..........

ربنا يحميها ويحافظها يااااااااااااااااااااااااارب



طب بذمتك.......بتفكرك بااااااااايه؟!؟!؟!؟

سلامو عليكوا.............

عمر الاهل ما كانوا اصدقاء

عبارة بنت لذينه كل شويه حد يطلع يقولك انا مصاحب ولادي ولا انا مصاحبه بنتي وبتقولي على كل حاجه وانا وهي مبنخبيش حاجه عن بعض.........

مش فاهم العالم دي بتجيب التفكير ده منين........يعني ايه حد فاكر ان ولاده اصحابه ومبيخبوش عنه حاجه وقال ايه الصراحه مع ولادهم لاقصى درجه.......

ازاي يعني حد يفهمني ازاي.؟؟!؟!؟.......انا معتقد اعتقاد يصل لحد اليقين ان مفيش اب مصاحب اولاده ولا في ام مصاحبه ولادها مهما كان الرابط بينهم...الاب اب والابن ابن والام ام والبنت بنت...في اسرار وخبايا مبتتقالش وفي حاجات بتتقال

الاهل يمكن مش فاهمين فكرت ان كتر زنهم...قولي مالك؟؟ قولي وانا اساعدك...مش احنا صحاب بردك؟!..متخفيش ومتخبيش عني حاجه انا عايز مصلحتك.........وكلام عبيط كتير اوي عشان فاكرين انهم بيهاودوا الولد او البنت عشان تحس براحه وتبدأ تكوووووور كل اللي عايزين هما يعرفوه عنهم وعن اللي بيعملوه.....

مهماش فهميني ان بردك عشان الزن اللي علطول ده الولد او البنت بيعمل نفس التصرف وبيدي الاب او الام الحاجه اللي هما عيزنها وهو ان الاب او الام يحس بانه عارف كل حاجه عن ابنه وبنته وعارف هما بيعملوا ايه وبتيصرفوا ازاي وحياتهم عايشه ازاي

الولد بيقول للاب او للام اللي هما عايزين يسمعوه يعني بالبلدي بيسكت زنهم باي حاجه تحسسهم انهم عرفوا يعرفوا كل حاجه
بس الاغلب من الحقيقه بيفضل مستخبي ومبيعرفهوش مهما حصل

محدش يقولي كلامك غلط....انا والدي مصاحبني ولا انا والدتي صحبتي ومبخبيش عليها حاجه.....

كل الكلام ده كدب.....وده مش ادعاء وخلاص دي الحقيقه....مش مصدقيني.....طب فكروا كده

ياترى قلتي لوالدتك انك اتعرفتي فمره على شاب ..........اه قلتلها طبعا دي عارفه الشاب ده
طب قلتيلها انكوا بتخرجوا سوا وانكوا بتتقابلو على طول فالكلية وكماان بره الكلية...........اه قلتلها عادي يعني مبعملش حاجه غلط
يعني انتي قلتيلها انكوا بتخرجوا سوا بالساعه والساعتين وبتلفوا فالشوارع سوا وهو ماسك ايدك وحاطط ايده على كتفك...قلتيلها انكوا بتروحوا تتقابلو فالجنينه ولا قدام المول سوا........قلتيلها كل حاجه كل حاجه.........متهيقلي الحق يتقال ان مستحيل تكون الام عارفه كل حاجه عن اللي انتي عملتيه كله كله اكيد في جزأ مستخبي معرفتهوش.......طب ومعرفتهوش هي ليه؟!!...ببساطه لان الجزأ ده مش بتاع الام مهواش الجزأ المسموح انها تعرفه او تسمعه مهما كان......

وانت يا اللي بتقولي اهلي عارفين كل حاجه عني وابويه او امي صحابي وبتكلم معاهم..........
يترى قلتلهم نفس الكلام اللي بتقوله لصحابك لما تعمل حاجه ......يترى بتفتح فالكلام وتحكي كل مغامراتك وتجاربك معاهم


متهيقلي كل ده مستحيل.........لا يمكن يكون الاهل اصدقاء بمعنى الكلمه

لان الصديق هو شخص بيسمعك وبيحكي معاك وبيكلمك وبيبادلك الكلام....بيسمع مصيبتك او حدوتك ويتناقش فيها معاك ويحاول يقنعك بالصح او يرشدك للي تتصرف بيه.....بس مش هيجي فمره كده ويقولك اسمع الكلام انا ابوك وادرى بمصلحتك
ولا تيجي صحبتك فمره وتقولك لو مسمعتش الكلام ما ابقاش امك ولا اعرفك.....ولا انت متستهلش انك تنفع لانك ولانك ولانك

وقت الزعل من صديقك...مبيفكركش بالغلط اللي عملته...انما لو مسمعتش كلام اهلك السلطة الابويه بقى تبدأ تظهر ويبدأ يحاسبك على كل تصرفاتك ولو جيت قلتله هو مش احنا صحاب هيقولك بس انا ابوك قبل ما اكون صاحبك

ببساطه كلمة انا صاحبك يا ابني مهي الا عبارة وجمله تافه بيقولها الاباء للحصول على اللي هما عايزينه ......مهماش فاهمين انهم بيتضحك عليهم لان ببساطه الحقيقه مبتتقالهمش مهما حصل........

هكمل الدلائل على اللي بقوله قريبا عشان نشوف بقى......

حد عنده رأي تاني؟!؟!؟!؟

محتار.......

بختصار انا مش زعلان والله مش زعلان بس الفكره لما حد يطلب نصيحتك في موضوع معين يخصه هو ويقولك اعمل ايه فيه وانت عشان بتحبه وبتعزه اوي اوي اوي بتروح تساعده وتكلمه وتقف جنبه فالطلب اللي طلبه عادي وده طبيعي عليك اساسا والزامي

الموضوع انه هو كان ماشي فسكه غلط وقالك اعمل ايه فالورطة اللي انا فيها دي وانت بتحاول توصله الصح ازاي هو يوصله
بس دورك بينتهي هنا انك تنصح وتوجه وتقول الاحسن وخلاص اه ممكن تشدد عليه وتلح عليه بس مستحيل يكون فايدك انك تجبره على حاجه لانك فالاول والاخر مجرد صديق او صاحب يعني ملكش سلطة سيطرة ولا في ايدك سلطة انك ترغمه على الحاجه دي

طيب....بس لما تيجي بعد كده وتكتشف انه معملش برأيك وانه لسه فنفس سلوكه او تصرفه ده بالصدفه تعرف انه ما خدش برايك ومنفذش اللي قلتهوله..........

هنا بقى تزعل... هو اللي بيحصل انك بتزعل وبتدايق وممكن تكلمه واواقات بتكون باين عليك العصبيه ده فالاساس لو انت بتحبه فعلا عشان حاسس ان انت قلتله على الحاجه اللي هي فعلا صح واللي المفروض تحصل وانت مش عاجبك انه لسه ماشي فنفس الطريق اللي هو فيه لانه غلط مش من وجة نظرك انت لا هو كمان عارف كده بس انت حاسس انه محتاج دفعه محتاج تشجيع محتاج حد ياخد بايده عشان كده انت لما تعرف انه مسمعش كلامك بتتدايق وبتتخنق وبتروح تواجه وتحاول تفهم منه كل حاجه تاني وتصر على رايك وتحاول تقنعه
بس ابدا..ابدا عمر كلامك ليه مبيكنش من جهة انك متدايق عشان انت تعبت نفسك عشانه وهو طنشك
المفروض والصح انك عمرك ما تزعل ولا تدايق لانه مااخدش برايك لانك لازم تكون فاهم اللي قلناه فالاول انت مجرد ناصح ومساعد للصديق بس منتش مسيطر على سلوكه او قراراته يبقى خلصين...ياتزعل عشانه وعشان خوفك عليه وبردك ترجع تحاول تاني وتالت تقنعه برايك وخلاص....

طيب نقول انك كلمته تاني.... وقالك كلام تاني وطلب منك مساعدته عشان اللي عايز يسيبه ده قرار صعب ومحتاج حد جنبه ونفترض انه سمع كلامك تاني وقالك خلاص خليك جنبي وساعدني وانا اوعدك ميحصلش كده تاني وخلاص احنا اتفقنا اننا هنبعد عن الطريق ده ونعمل الصح واللي نقتنع بيه..............

طبعا لازم تصدقه لانك ايه؟؟؟؟....مش فايدك بردك تكدبه متنساش انت مجرد سلطة بتنصح من منطلق حبها للشخص مش اكتر منتش سلطة تحكم وسيطره


طب نيجي بقى للمعضله...............رجعت تاني بعد فتره طويله عرفت انه ما اتغيرش وما عملش الاتفاق اللي كان بنكوا وقالك ساعدني فيه.....
يعني بردك طنشك وطنش نصيحتك............................

يترى الموقف ايه؟؟؟ الاحساس ايه؟؟؟رد الفعل هيكون ايه؟؟؟؟........
حد يرد عليه انا محتار ونفسي اعرف.......

تيييييييييييييت

هو انا ايه لزمتي؟؟؟؟؟؟؟

ولا اساسا بعمل ايه فام الحياة دي.............بيقولوا كل واحد جواه حاجه مميزة وكل واحده فيه مهاره محدد بس هو يدور عليها ويحاول وهيقدر يوصلها........

والاغنيه بيتقول.....حاول تاني وجرب وانت تلاقي السكه......

بس المصيبه الكحلي...ان انا لحد دلوقتي مش لاقي حاجه ولا حاسس باي حاجه ولا فاهم حاجه مش شايف غير ان مليش دور ولا ليا ميزة ولا حاجة مميزة انا بارع فيها واقدر عليها

انا ايه؟؟؟؟؟؟

انا مجرد واحد وسط الناس يادوب بقول كلمتين ولا بهزر باي حاجه وبنكت حبه ... واحد لادمه خفيف ولا دمه تقيل ساعة كده وساعه كده

بس متهيقلي مبيأثرش....موجود وسط صحابه وزمايله فالحقيقه او فالنت خلاص عادي كويس اديه موجود......بس غيابه مش بيأثر ولا هيأثر.. يمكن اساسا محدش يحس بيه ولا يفرق معاه لان الانسان ده ببساطه مش سايب بصمه ولا ليه اهميه

بالبلدي وجوده زي عدمه......

.يترى وقت ما يغيب ويختفي حد اساسا هيفكر يسأل عليه ولا يعبره ولا يحاول يطمن عليه؟؟؟

حد يقول هو راح فين؟؟؟ هو غاب ليه؟؟؟؟

يترى لما اموت........
حد هيفتكر حاجه ولا كان حاجه وعدت عليهم زي ما اي حاجه بتعدي طوووووول الوقت وجودها بيفرق اوقات بس غيبها عمره ما هيفرق

بجد كتير بخاف من الاحساس ده.....مش فارق مع اللي حوليه ولا هيفرق

........مش عارف شويه كلام متلخبط وحبيت اكبه على الصفحه هنا.....سلام

الى(ع)

انا بجد مش عارف ابدأ اقول ايه ولا منين ولا حاجه....بس انا مبقتش عايش غير محتار من ساعة اليوم اللي سبتيني فيه.....بصراحه مش عارف اقولك ايه

بصي انتي مش قادره تفهمي اني بجد كنت من زماااااااااااان اوي مكبر دماغي ومطنش كل حاجه حوليه كنت زي ما بيقولولي دايما كده عايش فغيبوبه على طول...معرفش حاجه عن اللي حوليه ولا بركز فحاجه مقضيها طناش وتكبير دماغ واستعبال وضحك وخلاص مكنتش بحب اقعد افكر فحاجه مهما كانت بالذات عن نفسي عشان ببقى عارف اني هدايق وازعل واتخنق واتعب عشان عارف اني مقصر ...كنت مقصر فتعاملي مع اهلي...فتصفرفي مع اصحابي....كنت مطنش فمذكرتي فالكلية مع انها كانت المفروض محتاجه مذاكره جدا جدا بس مكنش بفكر فكده مكنتش فارقه معايا كنت مليان احباط كنت عارف اني بأس ومحبط.. ومش نافع فحاجه وكل ده كان بيبعدني اكتر اوكتر عن اللي حوليه عشان مكنتش بعوز افكر فحاجه عشان مكنتش حاسس اني هقدر اعمل حاجه....كنت ماشي فصحراة وفاكر اني ماشي وعايش كويس ....كنت تايه ومش عارف اعمل ايه ولا موجود ليه ولا اساسا عايز ايه... وكنت فاكر اني انا كده صح وان المفروض افضل كده

كل ده واكتر كنت انا.... وكنت عايش كده..........ومفيش حاجه اتغيرت......................بس كل ده اتغير والله العظيم اتغير وبقيت حاجة تانيه وبشكل تاني..كل اللي حوليه لاحظوا ده عليا..كل زمايلي بقوا يقولولي انت بقيت بتذاكر بجد ايه اللي حصل؟؟؟ ايه اللي جرالك فجأه كده؟؟؟ بقيت مصحصح فالمحاضرات كلها بعد ما كنت معروف اني مبحضرتش ولا محاضرة الا وانام فيها مهما كانت....بقيت بكت محاضرات واروح اذاكر اللي اتقال اول باول....بقيت بفكر فبكرة وبحاول احسن من نفسي....كنت ماشي فسكة السجاير والشيشه...(يمكن اول مره تعرفي ده)...بس سبتهم وحلفت اني مش هقربلهم تاني لحد ما اموت مهما حصل بطلت السجاير وبطلت اساسا اقعد مع حد وهما بيشربوا الشيشه....حاولت اتغير رحت لعبت رياضه عشان اخس شويه كنت عارف ان شكلي تخين ومينفعش الشكل ده حاولت اتغير فشكلي وحاولت اتغير فشخصيتي......بقيت بحاول اعمل حاجات كويسه...حسسيت بامل فدنيتي وفكرة فكل حاجه بشكل صح....كان كل يوم بالنسبالي حاجه جديده جميله محتاجه جهد لازم اعمله واكون قده مهما حصل.....
كنت كل لحظة بحس فيها بالضعف او الحزن واليأس بلاقي طاقة امل تصحصحني وتنبهني ان في حاجة اهم مش عايزاني ايأس واحزن عايزاني اجد واجتهد عشان اقدر احققها..حاولت بكل جهدي اكون احسن واعمل الصح وحاولت وحاولت وحاولت وطردت كل الي كان جوايا من احباط مسبتهوش يسيطر عليا زي ما كنت بعد مكنت فغيبوبه بقيت صاحي وواعي....كانوا بيتريقوا اوقات فالامتحانات كانوا بيقولوا بقا اللي كان بينام تلات تربع اليوم قبل كده بقى دلوقتي بيذاكر من تلاته العصر لتلاته الفجر كل يوم....ودايما بيسألوا ايه اللي غيره بالشكل ده ايه اللي عمل فيه كل ده؟؟؟؟؟؟؟؟

مكنش حد مصدق ان انتي السبب ولا قادر يفهم ان انتي كنتي طاقة الامل بالنسبالي النور اللي صدقت ان ربنا بعتهولي فالوقت ده عشان افوق واعرف ان في حاجات كتير حلوه فالدنيا محتاجه نسعالها بجهد ونحاول عشانها....متقوليليش ازاي ولا ليه ولا اشمعنا انتي؟؟؟ انا من اول ما عرفتك حبيتك واتعلقت بيكي حاولت اكون حكيم فتصرفاتي واحساسي نحيتك....بس من اول ما شوفتك وعرفتك اتعلقت بيكي وكنت بحس كل ما اشوفك انك زي شحنه نور بتمدني بالطاقة من ساعة ما اشوفك لحد ما اشوفك تاني مره كل مره كنت بفتكرك كنت بفوق اكتر واكتر واكرز اكتر واكتر....حاولت وحاولت........

بدأت احس بنفسي...بدأت احس بدنيتي اللي حوليه....بدأت احس باني اقدر اعمل حاجه واني اقدر اكون كويس حتى لو مش لنفسي بس عشان اللي جنبي تستحق انها تفتخر بيها...كنت كل لحظة بفكر فيكي بشد حيلي اكتر....دايما كنت بفكر انك تستحقي احسن واحسن مليون مره مني واني بظلمك بقربك مني لان مش انا اللي تستحقيه بالمستوى ده...عشان كده كنت دايما بحاول بكل طريقه اعمل كل اللي اقدر عليه مهما كان عشان اسعد واعوض اي فرق عن اي حد عشان ما احسسكيش غير بالفرحه والسعاده...
كان زعلك عندي زي ضلمه بتغطي على طريقي وتقفله قدامي...مكنتش اقدر ازعلك ولا افكر اني ازعلك...زعلك كان توهان بالنسبالي ...ضحكتك كانت مصدر فرحي وكانت هدفي....حاولت وحاولت ....عملت كل حاجه تسعدك وفنفس الوقت حاولت فكل تصرف انه ميكنش يضرك او يجرحك او يأذيكي باي شكل
فاكره لما كنت بقولك لما نشوف اتنين واقفين ولا حاجه فالشارع او ماشيين جبن بعض...كنتي دايما تبصيلهم وتضحكي وبعدين تبصيلي مستنيه رد فعلي......كنت دايما بردعليكي واقولك انا عارف يا حبيبتي احساسك وصدقيني نفسي اسعدك بس لازم تفهمي ان احنا مش زي دول احنا مش اتنين عرفوا بعض فتره وبيتسلوا ومش هنكون كده ...احنا مش اتنين خرجوا مع بعض وبيوهمو كل واحد التاني انه هيكون ليه مهما حصل.... ويقولوه كلام كتير ملهوش معنه وقت ما يقولها قالاخر انا اسف مش هقدر ارتبط بيكي......انا بحبك انتي بحبك انتي وهفضل احبك وهفضل محافظ عليكي وواخد بالي منك...هكون اخوكي واكون حبيبك...اخوكي خايف عليكي وعلى اي تصرف يأذيكي ويضرك قدام اي حد مهما كان او اي تصرف يجرحك ويزعلك.... وحبيبيك بيسعدك وبيرضيكي وبيحققلك احلامك مهما كانت صغيره ومجرد افكار بتحلمي بيها وبتنبسطي بيها... من اول اكل المصاصه(فاكره؟؟؟؟) وبوكية الورد الكبير اللي نفسك فيه.... ولحد انك تجري وتتنططي زي العياال الصغيره ........وكل حاجه كنتي بتفكري فيها..كانت بالنسبالي اوامر لازم افكر ازاي احققهالك دلوقتي بدون ما اخالك الصح كاخوكي ولا ازعلك كحبيبك

كل ده وكل الكلام ده وكل الحياة اللي دبتيها جوايا وعيشتيني فيها....كل كلمة قلتيها وكل قصه حكيتهيا وكل حرف نطقتيه في اي حاجه وعشان اي حاجه لسه فاكره وبكفر فيه فاليوم مليون مره......

كل ده راح فجأه...كل ده انتها فجأه.......فلحظة الدنيا قلبت عليا....اخدتك مني خطف.....وخدت معاكي حياتي وابتسامتي اللي كانت معاكي بتطلع من قلبي.. خدتك الدنيا مني وانتي استسلمتيلها ووافقتي على قرارها بسهوله جدا رفضتي كل محاوله عشان احاول ارجعك
معرفش ازاي وافقتي ولا ليه وافقتي.؟؟؟؟ كنت بحاول وبحاول وبحاول...لافضت استسلم بسرعه وفضلت بحاول..وانتي ماسعدتنيش حتى فاي حاجه...معرفش استسلمتي ولا ايه اللي حصل؟؟؟؟؟؟


بغيابك كل حاجه انتهت عندي....رجعت زي ماكنت كل يوم زي اللي قبله مفيهوش فرق يوم بصحاه وفاخره بنام ووسط ده بعمل شويه حاجات بدون نفس..غصب عني لازم اقضي الايام دي...بس بدون هدف ولا امل ولا لازمه فالحياة
كل يوم بيعدي بقول يارب خديني وارحمني..مليش فالدنيا لزمه ولا قيمه ولا ليه حاجه ولا هدف......

بغيابك انتهيت............وبعندك واصرارك على البعد كل يوم بحس باحساس مش قادر اوصفه كل يوم من ساعتها بفكر كنتي بتحبيني ولا مكنتيش بتحبيني.....كتير بشتم نفسي مينفعش افكر كده..مينفعش اشكك فحبك ولا اقول كده...بس الحيرة والتوهان هو اللي بيعمل فيا كده...هو اللي بيخليني بقيت اشكك فكل حاجه كنت عايشها ...انا صدقيني برفض الاحساس ده وهفضل رافضه ومصدق كل حاجه فلتيها ليا مهما حصل ومهما قلتي عشان مش ممكن يكون احساسي ده كداب ولا يمكن يكون ده كان دور وبتمثليه عليه لانك انتي ببساطه مش كده انتي اطهر واجمل واروع من انك تتصرفي كده انا عارفك وفاهمك وعارف طبعك وعارف تفكيرك عارف كل حاجه وعشان عارف كل ده كل يوم حيرتي بتزيد اكتر واكتر....نفسي احس فاي تصرف او اي كلمة تقوليها اي رساله اصدقها بس مش عارف ولا شايف حاجه
قفلتي كل الابواب بينا واختفيتي وسبتنيني تايه وضايع.....مرت سنه واكتر من سنه ولسه مستنيكي وهفضل مستنيكي وخلاص مبقتش عايز حاجه تانيه غيرك.....

معاكي قلت كل احساسي وكل مشاعري ومن بعدك نسيت كل حاجه ومبقاش اي اجاسس ليه لزمه.......
نفسي ترجعيلي لسه تايه ولسه ضايع ومحتاجك جنبي عايزك ترجعيلي...............
ياااااااااااااااااااااااااااااااارب...........

تخطيف الاسبوع

(1)

الاثنين.....................27-4-2009

حط ايده علي كتفي كده من يمه ومن اليمه التانيه بصلي وبصوت عالي شويه عشان يسمع المغربي وطبعا كان واضح فيه كالعاده نبرة السخرية الجاهزه على طول...
وقالي : بقى انت بقى يا خليل هتدرب السنادي ولا مش هتدرب؟؟؟
كتمت خنقتي جوايا وحاولت ارد عااااااااادي
وقلتله: انا لو عايز اتدرب هروح اتدرب عادي انا فايدي اجيب تدريب بس انا اللي لسه متردد فالحوار ده وقلقان منه....
بصلي كده من تحت نظرته وهو كالعاده بيبتسم فوشي انا بس....
قالي : طااايب لو رحت بقى تدريب ولا حاجه ابقى وريني جواب التدريب كده ولا حاجه يا خليل.... لما نشوف...

وسابني وراح يمت المغربي وقاله بردك بنفس الصوت العالي عشان يسمعني....
شوفت خليل بيقولك ايه عن التدريب؟!!

والله انا ساعتها كنت متنرفز بس بحاول اكتم مديقتي جوايا عشان على طول كده فميستهلش الموضوع...

بس لما رد عليه المغربي كان بجمله واحده بس ريحتني وهدتني شويه وحسيت فيها بالانتصار....

قاله : طب وهتفرق معاك انت ايه يعني يا جمال يتدرب ولا لأ ؟؟....هو في ايه مالك؟؟؟

وهو منطقش...قاله : لا مليش اصل... وسكت ومكملش...

وكملنا طريقنا ورحنا جبنا الكاتشب عشان البيتزا اللي معانا...
مهي اصلها قربت تبرد اساسا واحنا جعانين من كتر اللف فالسويس....

(2)

الأربعاء........29-4-2009

والله هو الموقف كان كالاتي.............

كنا الصبح قبل امتحان الحاسب بتاعنا بتاع الميدتيرم ...

حوار دواير منطقية وشغلانة شرايح رقميه ومش عارف نظام ايه رقمي والتاني تناظري كلام غريب كده...بس ما علينا

صحينا الصبح ده على اساسا اننا نمنا وكده يعني... وكنا بنلبس وهنخرج عشان نلحق المحاضرة لما فتحت دولابي اخد ورقي

لاقيت كشكول كبير بتاع ورق فلوسكاب كان معايا ماما كانت مدياهلولي عشان استخدمه...

قلت كويس هحتاجه اساسا فالامتحان عشان بنحل في ورق من معانا

قطعت الخمس ورقات اللي محتاجهم وبقفل الدولاب..

هوووووووووووب..........

((متقطع كمان ورق للعيال المغربي والجمال على الاقل تاخد ثواب ياعم))

((ياعم هو حد اساسا هيفكر يعمل كده معايا... وانا مالي؟..))

((اه وانت مالك انت تعمل الصح وملكش دعوه مش كده ح اقطع وخد انت الثواب))

((بلاش حوار الثواب ده..ما انت لو قطعت دلوقتي وادتلهم هيبقى فيه نوع من الرياء يا حلو عشان انت عايز تثبت انك احسن منهم))

((رياء.. والله حرام والله مش بفكر كده انا مض قصدي كده....طب والله مش قاطع))

*********
وفعلا دخلت الدفتر وقفلت الدولاب.......بس رجعت فتحته تاني وفكرت...

***********
((مهو عشان ميبقاش رياء انا هقطع الورق واديهولهم واللي يحصل يحصل بقى))

((طب والكشكول يا عم هييخلص كده))

((يخلص هقطع الورق وخلاص انا مش هفكر فحاجه زي كده))

*******

وفعلا رحت وديتلهم الدفتر وقلت لكل واحد يقطع الورق اللي هو عايزه منه
وخدوا الكشكول وروحت ارجع الورق مكانه

*********

((استريحت يعني انت كده دلوقتي...واستفدت ايه يعني ده حتى كلمة شكرامقلوهاش ))

(( مش مشكلتي اللي حصل حصل بقى....))

((طب يا فالح ما تاخد الدفتر كمان عشان اللي معاك فالكلية تدي اللي تعرفهم اللي محتاجينه..
ولا كده الدفتر هيخلص..مش ده بردك خير وفيه ثواب ولا انا غلطان؟!!...))


ساعتها سكت...معرفتش افكر تاني ...قفلت الدولاب...

وتاهت افكاري ومعرفتش ارد ازاي ولا اقول ايه؟؟....

وكملت لبس ومشينا... وانا طول الطريق عمال افكر
هو انا كده صح ولا غلط؟؟...هو انا كده بعمل رياء ولا انا بعمل ايه؟؟؟؟

انا مش فاهم حاجه؟؟؟...........حد فاهم؟؟.......

تجربه.....

الأسبوع الجاي هجرب تجربه جديده ولذيذه بالنسبالي وهجرب استمتع بيها......
ربنا يسهل وتتم على خير...........
انا متحمس جدا ... وسعيد بيها جدا...
رغم انها جايه فوقت المفروض اذاكر فيه عشان اتعدل شويه فدرجاتي واعرف اعدي الترم ده
بس انا مبسوط جدا جدا جدا بالمحاوله دي....ربنا يسهل والعسكري ميوقفنيش..بس ويحرق الترجبه من اولها...

سلام...........

والله ربنا سترها...

كان حتة يوم.........

اتقلبت فالسرير كده وانا نايم...

بصيت فالموبايل العده الصيني اللي خالي حب يكافأني بنجاحي فجبهالي قال ايه من بره بس من ساعة ما جت وهي مطلعه عيني ومبهدلاني

حتى مبقتش استخدمه غير عشان اسمع منه اغاني منير وانا نايم

او وانا فاضي كده

ده حتى السماعات بتاعته سماعه واحده يعني لا هو نوكيا اصلي ولا هو صيني اصلي هو نوكلا....

مااااااعلينا....

بصيت فالساعه فالموبايل لقيتها 12 الا ربع قلت كويس اديني صحيت اخيرا مره بدري شويه

اصل بقالي كام يوم بنام ومبصحاش غير المغرب كده ولا حاجه

واهوا كمان انا كنت سهران اساسا امبارح للفجر يعني كويس ...

المهم...

قمت من السرير...

مفيش صوت فالشقه...

شكله كده محدش فالبيت..

خرجت من الاوضه بصيت فالبيت اكيد طبعا ماما مش موجوده تلاقيها كمان راحة المديرية بتاعتها عشان انهارده الخميس ...

بسيط فالصاله ايه ده؟!!!...

ده بابا كمان مش موجود...قلت لنفسي الراجل ده فيه حاجه اتغيرت بقاله كام يوم بيصحى بدري وبيخرج كمان ومبيقعدش فالبيت كالعاده..

في حاجه حصلت.......

ردت عليه وقالتلي

واحنا مالنا المهم انه مش موجود والبيت يا حلو لينا على الاقل لغاية الساعه 2 ونص كده يعني انهارده اجاااااااااااازه....

فرفشت بقى ورحت غسلت وشي ونظفت نفسي شويه كده

تقولش هخرج ولا حاجه...

وقلت لنفسي ادينا هنقضي كام ساعه فريش كده...

ماشي فالطرقه بتاعة الشقه(تقولش الطرقه طويله يعني..!!!)

ايه رأيك بقى يا ستي....نعملنا فطار كده ملوكي بيضتين اومليت وطبق سلطة.. وجمبيهم حته جبنه... وبعدين كباية النسكافيه البلاك وقاعده قدام النت ونعيش شويه بقى كده ولا حاجه...

قالتي اه ونشغل عبد الحليم ولا حاجه بقى المرادي بس بصوت عالي شويه بدل ما بابا كان كل شويه يوقلنا وطوا الصوت....

اه عندك حق والله كده يبقى القعده جميله وتخلي الواحد يفك شويه.......

اه بس خد بالك يا باشا مش لازم نطول فالتجهيز وكده خلينا سريع سريع لنلاقي حد طابب ولا حاجه واليوم يضيع فشوش.....

لالالا متقلقيش اليوم ده بتاعنا انا وانتي يا معلمه محدش هيعكننه خااااااالص....

طب بقولك ايه؟..متيجي نروح نشغل الجهاز واحنا عملين نجهز الفطار وكده......

فكره برده..........

ودخلت اوضتي وحطيت الفيشه بتاعة المحول بتاع الكهربه....تييييييييت......

كل الكهربة اشتغلت ماعادا الجهاز.......

هو في ايه؟؟...

انا عارف استني لما اشوف في ايه...........ايه ده ايه ده........الكابلات بتاعت الجهاز متشاله ومفيش وصلات للجهاز............

اوباااااااااا يمعلم مش قلتلك...تلاقي ماما فقست الموضوع........

بس ازاي يعني مش احنا موصلين التلفون امبارح وكل حاجه تمام

ازي عرفت بقى؟!!..........

ما انت حضرتك نسيت تظبط الساعه بتاعت التلفون بعد ما وصلته تاني....

ما انتي اللي مقلتليش......

لأا بقى يا فالح انا قلتك متنساش الساعه بس انت اللي طنشط...

ما انا مكنش معايا رصيد والله كنت هرن ازاي يعني على تلفون وارضي كمان......

وانا اش عرفني....

اديها اتطينت علينا احنا التنين طب وانت صحيح امبارح مرنتش من موبايل بابا ليه مهو كان فيه رصيد....

ياسلاااااام جايه تفتكري دلوقتي ومقلتيش كده ليه امبارح ما كنا سوا ولا نسيتي

يعني هو حد قلك تخش نت يعني امبارح خلاص زنقت على ساعه تفتح فيها النت........

والله!!...مهو النت فاصل من اسبوع اهو على الجهاز ومش بيشتغل الا نادرا وكنت فاضي وانتي عارفه وكمان ما انتي وافقتي اني اخش نت تلفون امبارح ولا نسيتي

وهو يعني انا ينفع اقولك لا متنساش ان كل ما حاجه تحصل غلط بترميها عليه انا وتسكت ها فاكر ولا افكرك....

طيب طيب خلاص والحل ايه دلوقتي......

اهي ماما عرفت اننا كنا فتحين نت امبارح من التلفون وتلاقيها هتولع فينا اول ما تيجي ايه الحل دلوقتي بقى....

انا عارفه حل ايه بقى...انا بقول نقعد شويه ونخش ننام تاني...انا عارفه اساسا ايه اللي صحانا دلوقتي مكنا بنام للمغرب اشمعنا يعني دلوقتي تصحى......

يااااااسلام دلوقتي ايه اللي صحانا والنسكافيه وعبد الحليم.......

هههههههه ياعم احنا في ايه ولا ايه بس.....

هنعمل ايه دلوقتي بقى...انا عارف ادينا قعدين مستنين اللي هيحصل.........

وفعلا رحت على التلفزيون...مجاليش نوم كنت قلقان ومش عارف اعمل ايه اصلها كانت وقعه جامده اوي ان ماما تعرف اني دخلت نت تاني من التلفون .........

قعدت على السرير قدام التلفزيون........عمال اقلب فالدش واتفرج على أي حاجه شوفت شويه برنامج كده عن هنري الثامن وجوازه وحياته اهو أي حاجه وخلاص......

واتفرجت على مقطع من فيلم اجنبي وعمال اقلب على طول وخلاص

الوووووووووو........في ايه يا باشا هنفضل نقلب كده فالتلفزيون مترسالك على حاجه انا عايزه اركز فحاجه بقى

وهو انتي عارفه تركزي...انا مش عارف.........

طب ومش عارف ليه بقى يعني حوار النت بردك ياعم دي كانت ساعة وخلاص

لا بس ماما هتدايق اوي اساسا وربنا يستر فرد فعلها انتي ناسيه ال300 جنيه بتوع نت التلفون فالاجازه هي اكيد مش هترحمني ربنا يستر بجد بقى انا قلقان من اللي هيحصل

يابني خايف من ايه بس هنعتذرلها ونقولها مكنتش غير ساعه وخلاص.....

بس اكيد هتزعق وتدايق يعني حبكت نخش نت يعني مكنت نمت ولا حاجه احسن اديني هتبهدل وهدايقها كمان اكتر واكتر

ياعم انت مكبرها كده ليه بس هي مش هتعمل حاجه متخافش مهو عادي يعني اعتبرها غلطه حصلت وخلاص

لا يا ستي بقى انتي ناسيه انها كانت من يومين بتزعق عشان النت وكتر القعده عليه وان مفيش مذاكره

اه طيب وفيها ايه...

فيها ايه؟؟؟ انتي مالك انهارده ....فيها انها هتدايق اني مكفنيش نت الوصلة العادي ودخلت تلفون كمان وهو اساسا ممنوع

يعني طيب والحل ايه بقى.......

هنشوف التلفزيون ولا نخش ننام ولا ايه الوضع؟؟؟؟

تلفزيون ايه بس يا غبيه انتي.....اقولك تيجي نسافر السويس وخلاص بقى

السويس؟!!!!!!.......انت مجنون يابني تروح السويس ازاي يعني

اه نسافر مش كده كده احنا راحين السويس بكره نروح دلوقتي وخلاص وكل حاجه معانا ومش هناخد اكل ولا حاجه يبقى نروح وخلاص بقى

وتروح السويس ليه بقى ان شاء الله كل ده عشان النت.........

اه عشان النت عشان انا خايف بصراحه بقى وقلقان ومش مطمن ومرعوب اوي اساسا من اللي هيحصل

انت جبان يا بني ولا عبيط

متشتميش ..انا كل الموضوع بجد عارف اني غلطان للاسف وغلطان اوي كمان ومش ناقصه مدايقه يعني ليها كفايه اللي حاصل اليومين دول مش ناقصه اساسا

ولا.....قوم نام احسن انت عبيط اساسا ومش عارفه انت قلقان ليه........

طيب مش هنفطر؟.........

ههههههههههههههههههههههههه

هههههههههههههههههههههه

ههههههههههههههههههه

مش بقولك لاسع والله وغريب.......

طب يلا نلحق نفطر ونخش ننام بقى ولا كأننا عرفنا حاجه

وفعلا......قمت وعملت طبق بيض كده سريعا سريعا وكلته وقمت داخل السرير وقافل عليه الاوضه ورجعت كل حاجه لمكانها كأني مصحتش لسه... وشغلت الموبايل ودخلت نمت وقررت ما اصحاش غير باليل..........

.........................................

((قوم يا بني عشان تتغدى معانا قوم يلا اخوك جه..........))

فتحت عيني شويه كده.....

أيه ده ...ده صوت ماما.هي جت؟؟...ربنا يستر

بصيت فالساعه....ايه ده دي الساعه 6 ونص ياااااااااااه انا نمت كتير اوي

استنى هنا هتقوم ولا هتعمل ايه؟؟؟؟

مش عارف ......انا بقول اقوم وخلاص بس مش هتكلم معاها ولا هقول حاجه هروح الاوضه التانيه وخلاص

طووووووويب......

وقمت وغسلت وشي واتشطفت... ورحت صليت المغرب وبعدين دخلت قدام التفزيون وقعدت قدامه

شويه ولقيتاه واقفه قدامي وبتضحكي كده وبتقولي......

طبعا انت عارف عملت ايه؟؟؟؟؟؟

قلتلها اه والله واسف والله العظيم هي كانت ساعة وخلاص ومش هتتكرر تاني

وان اتكررت تاني ..........

لا لا والله مش هتكرر تاني خالص والله بجد........

اساسا الطريقه دلوقتي محدش يعرفها غير ولا بابا ولا اخويه يعرفواها

وانا بجد مش هعملها تاني........

طايب لما نشوف..متنساش اللى كان فالاجازة واللي حصل بقولك وبلاش دلع خليك كبير شويه

حاضر ...حاضر والله قلتلك كانت مره وخلاص مش هتكرر تاني

طايب لما نشوف..........روح صحي اخوك بقى عشان تتغدوا سوا.........

بس خلاص.......الموضوع خلص على كده...... ورحت اصحي اخويه ورجعت قدام التلفزيون

شوف مش قلتلك .....قال وكنت عايز تسافر السويس...........

خلاص....نقول الحمد لله ان الحوار خلص على كده خلينا نتفرج بقى على أي حاجه

وجبنا راجل وست ستات واتفرجنا عليه وقعدت مرتااااااااااااااااااااااااح ومبسوط............

الحمد لله..............

..................................................................................

جامعة دي ولا وكالة تسويق

ولاد التيت.....فالكلية عندنا قال ايه على اساسا ان الجامعه كلها يعني بتحذوا حذوا الجامعات المتقدمه وبتسعى حثيثا للتحسين من العملية التعليميه كتر خيرهم اموا ايه........حطوا اعلان بسم الله ما شاء الله.........
((اتصل على 09000370من اي تلفون ارضي.. او01170 من اي تلفون محمول ))............شوفتوا الحلاوه...
ولا فالافلام العربي ممكن يفكروا فحاجه زي دي..بس عباقرة ام الكلية بتاعتنا تفتق زهنهم عن ان انسب اسلوب
عشان قال ايه يوفروا فلوس لتنمية التعليم فالجامعه وكله تحت شعار (( الجامعه ومواردها الذاتيه))
وكتر خير اتحاد الطلبة - اللي مبنسمعلهوش حس ولا حتى فمتش كوره - انه هو اللي عامل المشروع الضخم ده تحت رعايته فالكليه......
مااااااااااعلينا....... يعني مش هقولكم على كمية التعليقات والالفاظ اللي اتكتبت على الورقة بتاعت الاعلان.......

.... وجه وقت النتيجه...... واكيد واكيد عشان المحترمين فالكليه يعرفوا يستنفعوا نزلوها طبعا على التلفون واخروا نزولها فالكلية اسبوع بحاله عشان الكل يتصل ويغرم ويكسبهم مهي بقت سببوبه بقى ومصلحه نفعني واستنفع....بس ياريتهم نفعونا دول هما اللي استنفعوا واحنا رزعونا فوش الحيط خبط لزق كدهو.....
اكيد يعني تتصل تسمع المقدمه الغبيه ...

اهلا بيك فخدمة معرفة النتيجه لجامعه ما اعرفش ايه قال وفرحنين يقولك حصريا على التلفون...وتخش بقى تقول المنطقة اللي انت تبعها...الكلية اللي انت مرمي فيها...ثم فرقتك انهي زفته... ومن بعديها رقم جلوسك...
وهوووووووووووووب يتكرموا عليك ويدوك النتيجه.......مش عارف مادة ايه تقدريك فيها مش عارف ايه ... وشكرا على استخدامكم خدمة الجامعه........بس وتيت تيت تيت...قفلوا!!!!

انا سمعت المكلمة من هنا(سيبك من نتيجتي دلوقتي) واتخضيت...ايه ده؟!! بس كده؟!!...اعرف تقدير وخلاص؟!!...
يعني ولا حتى عملواها ميزه عشان يشجعوا الطلاب انهم يتصلوا انهم ينزلوا النتيجه على التلفون بالارقام...لا دول نزلوها زي الي بتطلع فالورق بالظبط...ولا اي ميزه........

يعني انا يا عااااااااااااااااااالم يا محترمين اوي اوي اوي(قلتش حاجه انا؟!!) اغرم 6 جنيه عشان اعرف شوية كلام فاضي زي ده........صحيح حمير بس اغبى من الحمير ذات نفسها..........

وتيجي تتكلم...يقولك وحد غصبك تتصل انت لو مش عايز تتصل استنى لغاية ما تتعلق النتيجه فالكليه...مع العلم انه أخروها عن وقتها الأًلي عشان يعرفوا يستفعوا من التلفون...
يعني اهو مهماش محترمين ولا حاجه ولا بيخيرونا اننا نجيب النتيجه باي طريقة احنا عايزينها...دول بيغصبونا...
مهو انا لما الاقي كل شويه واحد من زمايلي بيتصل يقولي جبت النتيجه ولا لسه؟؟ ويسألوا واحد ورا التاني عملت ايه؟؟؟ وكل واحد يقولي على نتيجته...
مهما كنت بارد فأعصابي ومكبر دماغي لازم احس بالقلق والفضول اني اعرف نتيجتي وطبعا اهلي مش هيسكتوا هيزنوا عليه عشان اعرفها كمان....
شوفوا انتوا بقى اللي بيعمل اسلوب زي ده يتوصف بأيه؟؟ مع ان اللي بيفكر فحاجات زي دي المفروض يكونوا دكاتره يعني عالم ليها دماغ وناس عاقله..مش شوية موظفين محترمين(قلتش حاجه انا؟!)
بس صحيح...........ربنا يستر علينا
قال ايه...مجانية التعليم.............هأو يا حلولي.......

ايمن نور خرج....

كنت قاعد على الجهاز كالعاده...بضيع وقتي فكلام فاضي...
مش فاكر كنت بشيت ولا بسم راديو صوتكم حاجه زي كده
وقال ايه...بفتح الفيس بوك...كنوع من التغيير يعني...
مبحبش البتاع ده كتير بس يعني اهو وقت وبحاول استغله فاي حاجه
المهم... واول ما دخلت شويه والاقي الستاتيو بتاعت صديق ليه (احمد ميلاد) كدهو..........
مبروك الافراج عن ايمن نور عقبال مصر
والله ساعتها تنحت.......نعم...هو في ايه...ده نفس اللي جه فدماغي...ايه اللي بيتقال ده...مفهمتش الخبر كويس....شويه والاقي استيتيو تانيه........
الحمد لله ايمن نور خرج بالسلامه............
وانا عمال اسأل نفسي...ايمن نور مين...ايمن نور بتاعنا ده...اللي فالسجن
خرج؟؟؟؟ طب ازاي؟؟ خرج كدهو يعني...حد يفهمني حاجه..........
رحت دغري على موقع الحزب...لقيت السطر ده......
انتظرونا قريبا والتوقيع الدكتور ايمن نور
والله ساعتها مصدقتش...بقيت زي المجنون....بدأت ساعتها افهم شويه...شكل الدكتور ايمن خرج.....
بس خرج ازاي واشمعنا دلوقتي كده....رحت على مصراوي.... ولقيت الخبر اليقين بقى..
الدكتور اخد افراج صحي بتوقيع النائب العام....
انا اتجننت ساعتها والله فرحت اوي...انا فاكر اني قعدت اصفر واهيص لوحدي -اهبل بقى تقولوا ايه- ورحت جري على التلفزيون اشوف الخبر وافهم اكتر...
قعدت قدام التلفزيون..عمال اقلب فالقنوات
الحياة ...دريم....المحور....الجزيرة...العربيه
ولا اي حاجه من دول جايب خبر
يادوب شريط تحت فالجزيرة مش مفهوم منه حاجه
قلت استنى لما نشوف البرنامج بتاعة التوك شو
برنامج الحياة اليوم كان اولهم....
وكانوا عملين يقولوا سبق صحفي واعلامي كبير انهم اول قناة مصرية تزيع لقطات لخروجه وهو فبيت
وكنت مستني على احر من الجمر(حلو دي!!)
الجميلة للابد..منى الشاذلي
والاكيد انها مكنش ممكن تخيب ظن كل اللي بيحبوها
كان الواحد عمال يفكر هتعمل هي ايه بقى واللي قبليها المحور والحياة جابت الصور والتسجيلات
كان متهيقلي الكل مستنيها والكل كان عارف انها مبتستسلمش بسهوله
وفعلا الجميلة عملتها واثبتت انها كفاااااااااااااااااءة ومش اي حد يبقى عمله برنامج بقى نجم.....
جابته بشخصه بلحمه ودمه لا صور ولا فيديو.....
جابت الدكتور ايمن نور شخصيا على الهواء مباشرة
والله كان منور...كانت عنيه زي ما هي بتلمع بالنصر والثقه
كان قوي زي كل مره ...
مكنش زي ما كانوا بيقولوا بيتكلم وخلاص
لا ده كان قوي اوي...كان كل الامل متجمع فكل كلمة بيقولها وكل تصرف بيعمله


مش عارف اقول ايهوالله خااااااااااااالص...........


بس الاكيد اني كنت فرحان زي ما كان كتير اوي اوي اوي فمصر كلها فرحانين ومهيصين بالخبر اللي حاجه كده زي لا ده احلى من مليون هدية من ربنا لكل واحد بيحاول بجد يغير ويتغير...
حسيت ان ربنا بيقولنا لسه في امل...لسه في مستقبل ممكن نبصله........

خرج ازاي ؟؟ مين اللي خرجه؟؟؟ مش بتفرق
المهم انه زي الاسد خرج بكل نوره يرجع من تاني ويملانا امل وحب لمصر واحساس بيها ..
مش مجرد حزن ويأس ....

الف مليون مبرو يا دكتور ايمن....الف مليون مبروك............

انا بحبك اوي يا دكتور...يمكن ما اشتركتش فالحزب ولا اي نشاط فعال لغاية دلوقتي...بس كفاية ان صورتك بتمثلنا الامل والحب والتفائل.....مبروك يا دكتور..... وياااااااااااارب تكون المحنة دي بداية لحياة بجد لينا كلنا فمصر


ويااااااااااااااااااااااااااااارب يا وهاب يا خالك الكون بأمرك.......
افرج عن مصر زي ما افرجت عن ايمن نور

ومازلت ادور في فلكها....

مر عام كامل على تعارفنا لاول مره..في 17-1-2008... و
مر عام ايضا على اول مره قالتها لي فيها 17-2-2008 عندما قلت لي احبك.......

لذلت اتذكر كل تفاصيل ذالك اليوم واحداثه تماما وكأنه حدث بالامس..لا منذ عام....

اتذكر كل ما دار فيه من مفارقات وتصرفات غريبه...ماذلت اتذكر حديثنا الاول وما كان منا من دهشة متبادله بيننا ...

مازلت اشعر بشعور اللهفة التي كانت داخلنا

كل منا كان يريد معرفت تفكير الاخر وتصرفاته...

ولكن لا اتذكر سوا كل ما كنت اشعر به من سعاده شديده...
كل حياتي تغيرت منذ التقيتها..منذ ان رأرتيها...
لا منذ ان بدأت اتحدث لها...لقد احببتها قبل ان اراها ...شعرت بالفرحه...بالحماس والقوة فحياتي..بدأت اشعر برغبتي في ان اتغير واكون افضل واحسن...بدأت اخرج من رغباتي فالوحده والتكبير والابتعاد عن الاصدقاء والمقربين...احسست انها امل وضع لي في طريقي من رب العالمين لكي اهتدي واتحسن...اندفعت فكل شئ بحب وفرحه وابتسامه ..كل ما كنت اقوم به اصبحت اقوم به بسعاده وامل......
يااااااااااااه كثرا ما اتذكر كل هذا التفاصيل والاحاسيس التي امتلأ بها قلبي فجأة دون تنبيه او بدايات واضحة المعالم....مجرد موجه بحر واندفعت وغمرتني وكما الامواج لم تدم تلك الموجة كثيرا...
سرعان ما تركتين موجتي ورحت عني
ابتعدت فجأه كما اقتربت مني فجأه...
كل احاث تلك الايام كشريط يدور في عقلي بانتظام دون انقطاع لا ينتهي مهما طال وقته....
وفي نفسي حيرة تقتلني وتزيد مرارتي..وكل ذلك مملؤ بالفرح والبهجة التي كنت اشعرها وانا معاها وبجوارها ولازلت اتذكرها جيدا بكل ما فيها...
ولكن نفسي تسأل كل يوم كالذي قبله...مالذي حدث؟!!..ماذا كان؟؟ وكيف انقلب كل ذلك فلحظات ؟؟....

كان بيننا شوق وحب...لا يمكن ان ينكره كل من رانا وعرفنا...فماذا حدث؟؟!!!...

كيف تحولة انا من حبيب لقلبها الى عدو لها؟؟...كيف اصبحت من مصدر سعادتها الى سبب شقائها وكأبتها؟!!

يتحرك ذلك الشريط الملئ بكل ذكرياتي التي ارفض ان افكر ان انساها فكلها كانت حياتي وفيها دارت اسعد ايامي...

كلما اقتربت من لحظات الفراق والنهاية...تزداد حيرتي...يزداد خوفي...ما السبب؟؟...ماذا حدث؟!!

استعيد كل لحظة ...كل كلمة...كل تصرف...
هل كانت تقصده؟!!.....
لا لقد اعتذرت هي عنه....
دعنا من هذا...هل تتذكر هذا القول؟....
لقد قالت لك انها كانت تتسلى هي واصدقائها...
ولكنها قالت لي بعدها ان ذلك كان فالبدايه.. وانها تغيرت ولا تكذب عليه...لالا...ليس هذا السبب....

اااااااااااااااااااااااااه.....
تنطلق كل يوم من داخلي حارة مليأة بالأسى..........ما الذي حدث؟!!....ارجوكي اخبريني....

كيف تركتيني؟...كيف قلتيها؟...كيف قررتيها فجأة ...هل تقبلتيها؟...كيف احسستي....هل كنت لعبة تتسلين بها...

ام كنت حب حقيقيا...كما كنت اشعر منكي فكل لحظة.......

اتراني اخطأت في قول ما لك....اعذريني فانتي تعلمين اني لا اقصد الا رضاكي ولا اسعى الا لحبك وسعادتك....

كلها تسألات تدور في عقلي كل يوم وليله..

يأبى عقلي ولا قلبي نسيانها او الحديث عن غيرها....

لقد اخطأت عندما احببتها.....
لالالا.....لا تقولي ذلك انتي تعرفين انهى تستحق اكثر من هذا....وانتي احبتتها كما احبتتها.......
نعم.....
انتي قلتيها لي...اننا لم نتفق سويا الا منذ ان رأيناها ودخلنا عالمها...لم يكن بيننا وفاق ولا تفاهم الا منذ وجودها..
نعم..........
فماذا حدث؟!!!......هل تخبرينني؟؟...
مر عام.. الم تنساها........
اتسألينني هذا السؤال.......هل ترني نسيتها؟؟...كل يوم يمضي بعيدا يزي شوقي وحبي لها...كيف انساها... لقد صارت محور حياتي ولا اقدر على ان اتركه...
لا امل في الانتظار...
لا اراني الا قربها...لا اراني لا لها......
وكيف الخلاص؟؟...
ياليتني اعرف نهايه لكل هذا...ياليتين اعرف هل هو وهم حب؟ ام هو حب حقيقي؟؟.......
لانهاية للحزن...ستظل تحبها...ما حييت......ولكن هل تحبك هي؟؟؟؟؟
ااااااااااااااااااااااااااه..............ليتني اعرف ...ليتني اراها وافهم منها كل ما قلته لي.........ياااااااااارب
نعم.......يارب حتى النهاية...........يارب

الانجلش....

بيقولك لازم تتعلم انجلش...عشان تبقى كويس فشغلك ومجال عملك .... وتنجح فحياتك....
اول ما الاجازة تبدأ تلاقي بابا خدك كده على جنب...وماما كل شويه تزن عليكي...
خدلك كورس انجليزي ولا كمبيوتر احسن عشان تعرف تتصرف لما تكبر وتتخرج وتبقى احسن من اللي معاك....وانا واخويه نبصلهم ونضحك...انجليزي ايه وكمبيوتر ايه اللي ناخدهم...
امال المواد اللي شغلين ناخدها بالانجليزي دي ايه؟ وكمان الكمبيوتر ما احنا مهريين فيه شغل...دا انا ببلط عليه للصبح يعني شغال كفاية اني مبخفش منه وبعرف اتعامل معاه يعني...
بس كانت ولازالت المشكله فالانجلش ده...مش عارف انا كويس فيه بعرف اقرأ كويس...
بس فعلا الموضوع محتاج تعود محتاج انك تقرأ وتجرب...كنا قاعدين انا واخويه مره وبابا جابلنا كتاب كده وقلنا اختاروا دوره من دول وقوليلي عليها عشان احجزهلكم
- بغض النظر عن ان الموضوع اتطنش كالعاده وكان كلام وخلاص - قعدنا نفكر انا واخويه قال ايه كنا عايزين ناخد عبري - مش بيتقال من تعلم لغة قوم امن شرهم-...عبط بقى تقولوا ايه........
بس لا ملهوش لازمه العبري...تيجي ناخد تركي...انت اهبل ياض تركي ايه اللي ناخده مناخد اسباني ولا فرنساوي ولا حاجه....لالالا فرنساوي ايه انا مصدقت خلصت منه فثانوي.....
اما الجميل فجأه سألني... ومتاخدوش انجليزي على طول ليه؟؟؟.........
انجليزي انجليزي ايه انت عبيط امال اللي بندرسه ده ايه؟؟؟
طب وهنروح بعيد ليه مش هنقاوح....تعالوا نعمل اختبار انجلش لينا................ههههههههههه.........عملنا وطلعت انا واخويه فوق المتوسط...الحمد لله......بس كان وحش...ألمفروض اننا نبقى كويسين فالانجلش........
بدأت من ساعتها افكر اني لازم اقرأ انجليزي ولو شويه احاول احسن نفسسي فيه حتى لو حبه حبه...افتكرت ان اخت صاحبي كانت فتربيه والسنه اللي فاتت بردك فكرت نفس التفكير اني اتحسن فالانجلش وخدت الروايات اللي عندها وكتاب شعر كده عشان اقرأهم......
مش فاكر مين اللي قال بس انا فاكر ان حد قال ان الشعر اول طريق تتحسن فيه فالانجلش..فتحت الكتاب شهر اني اعرف اقرأ فيه..ولو شويه...بقرأ كلام وخلاص...بس مش حاسس فيه انه شعر..شويه كلام وخلاص...مقدرتش افهم حاجه
وطول الفترة دي بردك حاولت فالقصص...جبت رواية كده اسمها 1984 او حاجه زي كده مش فاكر.قعدت فالصفحة الاولى لغاية دلوقتي مخلصتهاش...فيها كمية كلام رغي...بالهبل.......انا لغاية دلوقتي مصدوم منها اوي...بس فكرت تاني ارجع احاول شوف مع ان الدراسة بدات بس كيف عندي اني اركز واقرأ فالدراسه-يمكن مبحبش الكلية...مااااااا علينا مش موضوعنا دلوقتي -
بس مش عارف داخل المرادي باحساس اني مش هعرف اوصل اكتر من اللي عملته ...خايف مقدرش اجرب تاني.. وخايف مجربش...بس متهيقلي هحاول.. وهجرب...انا كده او كده مضيع فالانجلش من ناحية القرأة للكتب بالانجلش وكده يعني ....
بس هجرب........................ههههههههههه.......رخم ...........سلام

انا لسه صاحي....

انا لسه صاحي منمتش...
منمتش ليه طيب
وانام ليه؟
عشان تريح جسمك وترتاح وتعرف تكمل
طب اريح جسمي ليه؟؟ ولا اكمل ايه اساسا؟؟
حياتك ياعم الغبي.....ايه؟؟ عادي يعني امال انت مش عايز تنام ليه؟؟
عشان مش عارف اعمل ايه...نفسي اعمل حاجه....
حاجة ايه يعني؟
معرفش بس نفسي احس اني كويس او بعرف اعمل حاجه او بجرب حتى
ايه يا حج...انت بتلخبط فالكلام كده ليه في ايه بس؟؟
مفيش والله...بس انا اوقات انتي عارفه بزهق كده ومش عارف اعمل ايه.. ولا انا موجود ليه...تقدري تقوليلي احنا هنا ليه
هنا ليه.....عشان نعيش......
طب ونعيش ليه؟؟ انا عايز احس اني بعمل حاجه كويسه...
بس ياعم بس بطل الرغي الغبي ده........انا مش فاضيالك..
امال فاضيه لمين هو انتي ليكي حد غيري......
غور ياض...مش هكلمك هو انا ناقصه صداع..كفاية اللي انا فيه......
قصدك اللي احنا فيه....
على رايك اللي انا وانت فيه على طول ومبيخلسص.........قوم نام احسن.....
بس ما انا بقولك هنام ليه؟؟
انخمد ياض ومتصدعنيش.....روح نام وخليني اعرف اهدى كده شويه.........
طيب اشوفك على خير........

هو انا دماغي فيها ايه؟!!

بجد انا مش عارف دماغي فيها ايه بالظبط؟؟

انا عن نفسي مش عارف فيها ايه..شوف مع انها دماغي انا ومعايا بقالها كتير اوي بس مبقتش عارف بالظبط فيها ايه؟
هي فيها دين وميول للعباده وقراية القرأن والصلاة وقرأة الاذكار وكل اللي زي ده ،
ولا فيها قلت ادب والفاظ سافله ووالفرجه على قلة الأدب واتعلم حاجات زباله ولا فيها ايه؟
فيها كسوف وخجل واحترام وادب لبنات ومن البنات ولا فيها جرأة وسرمحه وحب اني اتعرف على البنات واتكلم معاهم واعمل علاقات معاهم؟
طب يمكن فيها تكبير دماغ وتطنيش للقرأية ولللكتب وللثقافه؟ ولا يمكن انا مليان قرأية وبحب الكتب بكل انواعها وعندي رغبة اني اقرأ على طول
طب هي بجد فيها ايه؟؟؟؟
مش مصدقني...طب شوف بنفسك........
بحب الافلام الاجنبي بس نادرا نادرا جدا ويمكن عمرها ما حصلت اني قدرت اعرف اسماء افلام واسماء الممثلين بتوعهم..يعني لو حتى عجبني فيلم احتمالية اني افتكره بعد وقت طويل واقول اسمه للي بكلمه او اي حاجه بتبقى صعبة جدا......
مبقدرش افتكر اشماء الممثلين بتعامل مع الموشوف بفكرة الشبه...مبقدرش اوصل انهي فيلم انا بتكلم عليه لاني ببساطه مش عارفه اسمه ولا نجومه ولا اي حاجه!!!...يمكن ببالغ؟؟
طب ما انا بسمع او كنت يعني بسمع اغاني كتير وفي اغاني كده اكيد الواحد بيسمعها بيبحها وبيحس انها بتأثر فيه وبيبقى نفسه يسمعها كتير تاني...بس مبفتكرش اسم المغني مثلا بمجرد ما الاغنية تخلص بحس اني نسيت كل حاجه عنها مهما كانت اسمها كان ايه؟ مين اللي بيغنيها؟ كانت كلماتها ايه؟ بنسى كل ده....
ممكن تلاقيني بقول كلام الاغنيه معاها وهي شغاله بس مجرد ما تخلص تقولي كنت بتقول ايه يا اقول كلمة وخلاص يا اقولك مش فاكر.........
حاسس اني مطنش حاجات كتير اوي...يمكن تقولي طب واللي بتقوله ده مشكله يعني ده شئ عادي وانا ممكن انسى اغنيه او فيلم عادي يعني

بس انا بقولك لا مش عارف متهيقلي مش عادي..
انا حاسس انه بقى شئ مبالغ فيه ... او بقى طبع غالب عليه وهو ده اللي مش عادي
ازاي؟؟...
اقولك ازاي...لما تبقى فكليتك تلات سنين رايح جاي ومتقدرش تعرف تفصيل كتير عنها..متقدرش تفتكر طريق المواصلات بتاعك لو واحد سألت هو ميدان لبنان جاي امتى؟ متقدرش تقوله لانك مش فاكر هو فين الميدان ده؟ كل اللي فاكره ان الاتوبيس بيعدي عليه وخلاص...يادوب بتبقى فاكر طريك العادي وحافظه وخلاص....مبحبش افكر فحاجات تانيه او بقيت مكبر عن حاجات كتير اوي
تلاقيك بتقول طب ياعم وهو حد قدك ياريتني زيك؟؟...فكرك كده...تفكتر ان دي نعمه انا متهيقلي انها حاجه صعبه اوي انك متفتكرش الناس ولا اسمائهم ...متفتكرش الطريق والعناوين...متقدرش تفتكر الارقام بتاعت التلفونات...كل ده متهيقلي بيجي عند مرحلة وميبقاش نعمه بيبقى مرحلة صعبه...اوقات بفكر اني نفسي اخرج من الحلة دي
بكون بتفرج على فيلم اجنبي..ادور على اسماء نجومه وعنوانه واحفظه...اه والله بحاول احفظه...
بس يا ابو زيد كأنك ما غزيت..
ممكن افتكره ثنيتين بعد كده...بس اكيد اني مش هفتكره كتير... والله وده بيعصب وبيدايق اوي...لما تبقى مع صحابك وتلاقيهم بيتكلموا على حاجه او فيلم او اغنيه او كده يعني وانت فاكر بس في ضباب عليك كده تحس انه مانعك انك تفتكر كل حاجه حتى على الاقل زي ما هما فاكرينهم
الوضع ده بيخنق الواحد وبيحسسه بالتعب والقرف من نفسه....تبدأ تفكر هو في ايه؟ هو انا مش كده ليه ؟ هو انا هفضل على طول كده؟ ولا انا ممكن اتغير ...يمكن عشان لسه مكبرتش اوي يمكن ده طبيعي وعادي يعني...بس طب ازاي مهم حوليه اهم واصغر مني كمان صحابي وبيفتكروا اللي انا مبفتكرهوش..........

طب ياعم الباشا وانا مال امي بالكلام اللي بتقوله ده؟؟؟

وهو انا كنت طلبت منك تسمعني براحتك ياعم...على العموم انا خلصت..................سلام