هندسة بترول السويس....

انت فهندسة السويس؟؟...البترول؟؟...ايوه يعني هتاخد على قلبك قد كده

جمل كهذه وغيرها تقال لطلبة هندسة بترول السويس، يعتقد الناس ان من يدخل الكلية فانه يضمن مستقبله، لايعلمون الا انها الكلية الاعلى في مجموع الثانوية العامة وتخصصها مجال هام في مصر وخارج مصر

ولكنهم لا يعرفون عن الكلية نفسها اي شئ، لايعلمون ما يعانيه هؤلاء الطلبة واهلهم خلال الخمس سنوات الدراسية، المشاكل التي يعانيها طلبة الكلية كثيرة، وفي كل عام تزداد سوء، ومشاكل فالكلية نفسها ومشاكل سكن ومشاكل المواصلات وغيرها الكثير

نعم هي كلية بترول لكن ليس لوزارة البترول اي علاقة بها حتى الان..فلا هي توفر لطلبتها فرص تدريب او تقدم دعم مادي لها، فالبديهي ان هذا الكلية الحكومية هي مصدر الثروة الحقيقية في مجال البترول ورفع كفاءة طلبتها هو الاهم لتنمية هذا المجال، الا ان الوزارة لا تقوم باي شئ اتجاهها.

مباني الكلية قديمة ولاتستوعب الاعداد المتزايده من الطلبة، وقاعات المحاضرات غير مجهزة بابسط الامكانيات ليستطيع الطلبة الاستماع للدكتور، فمن لم يستطع الجلوس فالصفوف الاولى فلا فائدة من ان يحاول الاستماع، وماتم تحديثه من قاعات جديده فكلها موجهه لطلبة القسم الخاص ذلك القسمالذي ظلم طلبة القسم الحكومي فكل الامكانيات موفرة لهذا القسم فقط ، والحجة بوجوده هو زيادة موارد الكلية



لكن السؤال من المستفيد من هذه الزيادة؟؟؟



وفي المواصلات حدث ولا حرج، عن المواصلات الداخلية من الكلية مساءا التي لن تجدها وان استغل السائقون الوقت وقاموا برفع الاجرة فلا تعترض والا ستنتظر بالساعات او ستاخد الطريق على قدميك

وعن أتوبيسات السفر، قالوا استخرجوا اشتركات للطلبة لتنخفض تذكرة السفر من12جنيهات الى 9جنيهات ونصف!!!



وان تحدثنا عن احوال اقامة الطلبة، فطالب هندسة بترول السويس اما ان يقيم في المدينة الجامعية واما ان يقوم مع اخرين باستئجار شقة للاقامة

وفي المدينة الجامعية تكثر الشكاوي، فبداية من ان المبنى المخصص لطلبة هندسة بترول عبارة عن 4 أدوار في كل دور 20 غرفة بمعدل 6طلبة فالغرفة الواحدة،

وبحسبة بسيطة تجد ان 480 طالب فقط يمكنهم الاقامة فالمدينة من 5فرق دراسية مختلفة فالكلية!!



وداخل المدينة نفسها تزيد المشاكل، بين سوء الطعام وعدم كفايته، ورداءة مياة الشرب التي تسببت فاصابة الكثيرين بامراض وحصاوي قبل ان يكملوا ال20 من عمرهم!!!



وان كان نصيبك هو السكن الخارجي فلا تشتكي من ارتفاع اسعار الايجار التي لايرحم اصحابها والاسعار تبدأ من 400 الى 1500 جنية دون ان تشمل مصاريف المياة والكهرباء.

اي ان طالب السكن الخارجي مصروفاته قد تصل الى1000 جنية في الشهر لايجار السكن ومصاريف الطعام والمواصلات والكلية فقط!!!



كلية هندسة بترول السويس كانت ولازالت الافضل في مصر وطلبتها الاعلى كفاءة,وهم لا يتمنون الا ان يحصولوا على حل لمشاكلهم...فهل يستطيعون؟!!

انا اسف ليكي

((أجعل حبيبتك صديقتك....ولا تجعل صديقتك حبيبتك))
دي مجرد حكمة طلعت مني وبدأت افهمها دلوقتي واقتنع بيها اوي اوي
والمقصود بيها العلاقة بين الولد والبنت.........

الجزأ الأول :

يعني بالبلدي كده

الانسانه اللي اتعرفت عليها وارتبط بيها ونشأت بينكوا علاقة حب واعجاب متبادله وبدأ الحب بينكوا كل ده احساس جميل ورائع ومدهش جدا جدا ...وفي ظني ان الحب مش مجرد كلام معسول ورومانسيه وورود وهدايا..ومكالمات تلفونيه ورسايل مليانه كلام حب واغاني وعشق...
كل ده جميل ومهم ورااائع ولازم منه طبعا لان ده احساس حب ورومانسيه ...بس المشكله هل الرومانسيه بس هي اللي بتقوم الحب وبتفضل معيشاه للابد.....اظن كلنا نتفق ان ده مش ممكن لان محدش هيفضل طول حياته مهما بلغت درجة عاطفته صاحي ونايم على كلام حب وخلاص
اللي بيخلي الحب يستر ويدوم لفترات طوووووويله جدا جدا-في ظني عالاقل- هو كلمة واحده بس

((المشاركة)) = ((الصداقة))
يعني تشارك حبيبتك وتشاركي حبيبك في حياتك...في افكارك...في أراءك عن الدنيا...في المشاكل اللي بتواجهيها..في اللي بتحبيه واللي بتكرهيه....

المشاركه هي اهم حاجه بتخلي الطرف التاني مليان فرحه وسعاده لانه حاسس وعارف انه جزأ من الانسان ده ...بيحكيله على كل اللي عايشه وبيمر بيه او مر بيه قبل كده....بيلاقوا نقاط مشتركه بينهم وكمان يكتشفوا نقاط اختلاف بينهم ...يبدا يكون بينهم جدالات ونقاشات وحوارات كتير
ميكونوش مجرد حبيبين رومانسيين وبعد ما يخلصوا حبة الرومانسيه اللي معاهم يبداو يبصوا لبعض ويتنحوا..لا بينهم حياة ومشاكل ومواقف واراء كتير بيتكلموا عليهم وبيتناقشوا فيها وبيختلفوا وبيتفقوا كمان مع بعض....

بينهم حياة.....

عشان كده احسن احساس واجمل حاجه انك تجعل من شريكتك فالحب صديقة ليك.....متحتجش حد غيرها تفضفضلوه ولا حد غيرها تحكيله مشاكلك والصعوبات اللي بتدايقك ....

عشان كده

((أجعل حبيبتك.....صديقة لك))


الجزأ الثاني :

((لاتجعل صديقتك حبيبة لك))

انسانه اتعرفت عليها كأخت وصديقه...جمع ما بينكوا شئ مشترك اشتركتوا فيه سواء كلية واحده او نشاط واحد او موقع واحد او اي حاجه
خلت بينكوا احتكاك وتعامل يومي دائم
كل ده خلق بينكوا احساس بالموده والراحه ....الأولفة والانبساط ده كلها احاسيس بينهم اتعبر عنها ...باحساس الصداقه بينهم...متعبرش عنها باحساس تاني او مفهوم تاني...
بتتقال كده انا ارتحت للبنت دي زي صديقه واخت ليه..برتاح فالكلام معاها ومبسوط فوجودي معاها لانها شخصييه كويسه
طب يعني بتحبها؟؟؟...........لا مش حب من الحب ده ...ده حب زي بين اخوات اخ واخته
حب اهتمام ومسؤولية عليها واني شايف انها انسانه كويسه جدا جدا وربنا يوفقها ويسعدها
مبيبقاش حب
بيكون ما بنهم احساس صداقه كبير جدا جدا...احساس قوي ومتبادل من الطرفين بيكون صداقه بجد قويه ومتبادله بشكل جميل تخليهم يفهموا معنى الصديق الحقيقي ويرتاحول لبعض...بس ابدا ابدا عمرها ما بتتقلب لحب وعواطف والعلاقه دي....لانهم شايفين ان الارتباط الصداقه بينهم اهم واحسن

وهو ده الصح.....الصداقه بينهم بتتطور لاخوه وعلاقة متقاربه جدا جدا واهتمام متبادل بس الاتنين بيتفادوا باي حال من الاحوال انهم ينتقلوا لمرحلة كلمات الحب والعواطف لانهم عارفين انها مش موجود

البنت بتكون اكتر طيبه ورقه وعاطفه وبتكون حاسه انها مسؤولة عن الولد اللي بقى زي اخوها كده وبتفرح انها تهتم بيه وتاخد بالها منه
وفنفس الوقت بتحب وتفرح باحساسه بخوفه عليها ورعايته ليها..
الاثنين مبيشوفوش غلط ولا عيب فاهتامهم ده لانهم حاطينله حدود وبقى بينهم ثقه متبادله جدا جدا
واحساس خلاص ان ده اخويه ودي اختي
الولد هو اللي شايل المسؤولية اكتر على فكره فموقف زي ده...دوره انه يقدر يحافظ على علاقة الصداقه والاخوه دي بينه وبين البنت بدون ما يستغلها باسلوب وحش او انه يحاول يرقي العلاقة دي لاكتر ما تتحمله الروابط بينهم
الولد هو الاكثر قدر على التحكم في العلاقة والروابط بينه وبين البنت الاخت ليه...

عشان كده الولد هو الخسران لو غلط فمره وحب يفكر انه يطور العلاقه دي الى مرحلة الحب والعواطف

غلط لاسباب كتيرة :
1- ان اساسا المشاعر بينهم نمت وكبرت على احساس الاخوه والاحترام اللي بعيد عن العواطف تمام...وبالتالي كلمة الحب اللي الولد بيقولها بعد كده وبيستخدمها كنقطة تحول فعلاقته بالبنت بتكون مجرد كلمة مش حقيقيه مهواش الحب الحب انما هو الحب اللي بيعبر عن زياده الاهتمام الشديد اوي اوي بين الاتنين ببعض وانهم بقوا متعلقين ببعض جدا جدا وبيحسوا انهم الاتنين بيكملوا بعض بس هما عارفين ان ده اخوه وصداقه مش اكتر ولا اقل...وبحاولوا طول الوقت يعدوا مرحلة الاخوه والصداقه دي بس بتكون واقفه قدامهم لانهم هما اللي عارفين انهم مش اكتر من كده بالنسبه لبعض...((.اخويه اه...انما حبيبي؟!؟!؟!.....صعبه دي))

2- العلاقة بينهم اللي حولوها لمسمى حب لو لا قدر الله باظت ومنفعش انها تكمل..بينعكس ده على التفكير بتاع البنت اتجاه الولد وتبدأ تسترجع كل علاقتهم وكل تعاملهم سوا من ااااااااول مره وتبدا تترجم كل تصرفاته وكل كلامه على انه كدب وسرقه وخداع وانه زيه زي اي ولد تاني كداب وكان بيلعب بيها وبيستلى ومكنش صادق حتى في صداقته وكلامه الكتير ده عن الاخوه والاهتمام بيها....

يعني

((لاتجعل...صديقتك....حبيبتك))

بالعربي كده وبعد الرغي كله ده والكلام الغبي ده.....


الولد هو الخسران لما يجعل صديقته حبيبته....لانه بفقدانه لحبهم بيفقد اي صله بينهم ...بيفقد حتى الصداقه او الذكرى الحلوة في ذهن الانسان اللي كان بيعاملها....بيفقد اي احتمال انها تفتكره بخير او تقول ان اللي حصل بينهم كان قداء وقدر ومكنش بايد حد
بيخسر لان اسمه بقى فذهنا نقطة سودا متحبش تفتكرها ولا تسمع عنها....بيخسر كتيييييييييييييييير جدا جدا جدا فالحالة دي

اتا غلطااااااااااان............انا غلطااااااااااااان

انا خسرت احترام وتقدير واهتمام ومحبه من صديقه واخت اعتزيت جدا جدا باني قربت منها وكسبت وجودي جنبها...
انا خسرت الانسان دي لاني انسان كنت سيأ في تقديري ومكنتش مركز فتصرفاتي...
وعبرت عن شدة اهتمامي بيها وبحياتها وخوفي عليها باسلوب خلاني احول علاقتي بيها لنوع من الارتباط اللي مدمش كتير ومستمرش فتره طويل ....
مجرد ما اتنطقت الكلمة ...مكنش في باب رجوع تاني للي فات....يا اما تستمر فالعلاقة الجديده اللي انت اللي بدأتها ...ياتقطع علاقتك بيها تماااااااااما وتنفصل عنها فكل حياتها وفكل اللي يجمع بينكوا وتخسر اهتماها وتحله لكره وضيق منك ولحتى سيرتك

انا خسرت لاني نطقت الكلمة...وبعدين اكتشفت اني مش قادر اكمل فيها بس خلاص كانت الكلمة اتقالت واللي حصل حصل...
وكان اختيار اللي مكنش اساسا اختيار ده كان اجبار وغصب اني ابعد واختفي تماما واي صلة بينا تنقطع مهما كااااانت مهما كااااانت

وهتسجل عندها........انسان سيئ ..غشاش وخادع...بياع كلام...بيتسلى ببنات الناس.....غبي ...الخ الخ

وكل ذكرات لو فضل لسه ...اتحولت لذكريات محروقه ....تدايقها وتزود كرها ليها

الى الانسانه دي.....

انا اسف اسف لاني كنت طماع وكنت متسرع...أسف لاني اسأت ليكي بالكلمة دي...اسف اني جرحت وان مكنتش اقصد...لاني والله العظيم مكنتش اقدر اجرح اخت اعتزيت داااااايما بان ليا الشرف اني عرفتها واتعرفت عليها
وقدرت اكسب ثقتها واهتمامها......والظاهر اني مقدرتش احافظ على الاهتمام ده بالشكل الصحيح وكنت طماع وغشيم فتعاملي

انا اسف ليكي جدا جدا....

عارف انك مممكن متصدقنيش....ولا ينفع نرجع نتكلم تاني ونتعامل طبيعي زي مكان.....انا عارف اني جرحتك اوي اوي بدون قصد


عشاااااااااااااااااااااااان ده كله انا مخسرتش غير اخت وصديقه.......


اوعى اوعى اوعى حد يحول صداقته لحب....والا هيخسر كتيييييييييييييييييير جدا


انا ااااااااااااااسف ليكي والله اسف......يارب تكوني شايفه الكلام ده وتحاولي تفهمي.......

أنا جبيله..... معنديش دم

اه انا جبله معنديش دم ولا ليه قيمه

انا جبله ومعنديش دم
عشان بقعد باكل وبلهط فالاكل وانا بتفرج عالنشره كانها زيها زي اي برنامج تاني بيسليني

انا جبله
وانا كل شويه بسمع اخبار عن اللي بيحصل في فلسطين للفلسطينين هناك وبفضل قاعد بتفرج وانا باكل

انا جبله معنديش دم ولا حيا..
وانا قاعد بتفرج على خبر تدمير مسجد في فلسطين على ايد مستطوطنين كلاب ...ولسه قاعد

انا جبله معنديش دم
لاني بشوف صور االتدمير للمسجد وشايف قدامي صور الحرق في المصاحف والمصليات...ولسه متنيل قاعد

انا جبله معنديش دم...
لان اي اللي هيخليني اتحرك لمسجد عادي زيه زي غيره اذا اكنت متحركتش لما كانوا بيعتدوا عالمسجد الاقصي ولسه بيعتدوا عليه....
هنا او هناك قاعد وبفترج وعمال اكل بايدي اليمين وايدي الشمال

انا جبله معنديش دم....
عشان كل يوم بقعد اتفرج وامصمص شفايفي وانا بشرب اي حاجه ..وبتفرج على صور التعذيب والقتل فاخواتي الفسطينين وبردك مببطلش شرب ولسه بتفرج

انا جبله معنديش دم....
عشان ساكت ومبتحركش ولا حتى بغير المحطه لو جابوا قدامي ام بتعيط عشان فقدت ولادها فعملية اغتيال ولا قصف لبيتهم وعماله تصوت وتلطم....

انا جبله ومعنديش دم...
لان الام دي وغيره كبار وصغار كل ما يجرالهم حاجه من قصف او تدمير لبيوتهم بيقولوا يارب وبيبكوا لكن بيفضلوا صامدين ومستحملين ومبيضعفوش ابدا.........
انما انا......باكل فالحلاويات وبكسر فالشبسي وانا بتفرج عليهم

انا جبله ومعنديش دم....
لما بفضل قاعد وبسمع واتفرج واشوف......وفالاخر اقوم اغسل ايدي من الاكل ....وادورعلى فلم اتفرج عليه

انا جبله ومعنديش دم.........
لاني بعد كل الكلام ده لسه زي ما انا ومش هيتغير حاجه فتصرفاتي.....ياترى انت زيي؟!؟!؟!

طرطشة كلام-1

* بدأت افهم واستوعب بشكل كبير دلوقتي فكرة ان الوجه الاخر للحب الحزن ..
انا شايف ان الحب زيه زي اي حاجه فالدنيا لازم يتدفعله الثمن..
على قد ما بتستخدم السلعه وعلى قد اهميتها عندك لازم تتدفع تمنها...ببساطه....
لما بتروح الملاهي عشان تلعب اي لعبه فيها مش بتدفع تذكره؟!!..
وطبعا في العاب ليها تذاكر قليلة وفي العاب تذكرتها غاليه جدا...طب اي الفرق؟!؟!...
الفرق اللعبة بتذكره غاليه بتدينا متعه اكتر عشان كده لازم تدفع اكتر.......حد فاهم حاجه.......

اقولك انا.... الحب ده سلعه بتقدمها الدنيا لينا وبتعرضه علينا وانت بتاخد الحب ده وبتجربه وبتعيش فيه وتشوفه....
بتاخد منه متعه وسعاده على قد ما تاخد وبتعمل اللي انت عااااااوزه باسم الحب....بس يا حلو لازم تدفع الثمن لانها ببساطه دنيا مش اخره....
وثمن الحب بيكون ظاهر على شكل حزن وألم وتعب...
ولازم كل واحد فينا يفهم النقطه دي ويستوعبها..الدنيا مبتظلمش ولا بتسرق حد من حد..الدنيا مش كذابه ولا مكروها...الدنيا ببساطه زيها زي اي تاجر بتتعامل بالطريقه التجاريه مع اي حاجه...واظن ده حقها..مهي دنيا مهياش اخره فيها عدل وحق وخير...
دي دنيا وهي عشان دنيا احنا البشر عايشين فيها...تحب تسمع قايمة اسعار الحب عند الدنيا
...أسمعها واحفظها وركز فيها ولازم تفهمها وتتحملها يا اما من الاول متقربش من اي سلعه الدنيا بتعرضها ...
عشان متجيش هيا تطلب التمن تقوم قالب عليها.........حد فاهم حاجه؟؟!؟!؟

السلعه..................................................................................التكلفة المتوقعة

حب(شهر الى خمس شهور)وانقطاع العلاقة اسبوع مدايقه وحزن وشعور بالخنقه

حب(فوق الخمس شهور الى سنه)وانقطاع العلاقة اكتئاب وحزن وشده جرح قد تصل الى عدة شهور طويله

حب مستمر اكتر من سنه بدون انطقاع علاقة مشاكل وخناقات واختلافات فالاراء

حب لمجرد التجربه والاستمتاع بعلاقة مجرد ديق بسيط بضياع التسلية من ايدك وبس


ملاحظة :

الاسعار تختلف باختلاف قيمة الاستهلاك من السلعه سواء حب قليل(تسليه او فراغ) او حب قوي متين مملوء بالعواطف والاحاسيس
كلما زادت شدة الحب والمشاعر كلما تضاعف السعر....وكل واحد حسب طلبه كله موجود......بس انت وشطارتك تتحمله بقا...

طرطشة كلام

صراحه مش عارف ابدا كلامي منين.....ياترى اتكلم على اللي فات واللي مريت بيه فالفتره اللي فاتت....

اتكلم عن الناس الجميله اللي انا سبتهم من غير ما اقولهم لي وازاي وامتى وفين....؟؟؟؟

واتكلم عن الفشل اللي مريت بيه فتره فاتت واللخبطه اللي جت فدماغي

اتكلم عن اهم مشكله بتكرهني فنفسي ومحسساني باقصى درجات الاحباط واليأس والخوف من اللي جاي

ولا اتكلم عن احلى واجمل لحظة مريت بيها...أكلم عنها ازاي بدأت وحصلت ازاي...واتقدمت خطوه بعد خطوه ازاي...

اكتب عن اللي ندمت عليه ومش عاوز اكرره.....ولا اكتب عن اللي عاوزه وبحلم بيه وبدأت افكر فيه وارسمه حلم ليا

اتكلم عن جمعية رسالة ...والايام اللي فيها............


ياااااااااااااااه..........صحيح دي حاجات كتير اوي اوي...مكنتش متوقع اني الاقي حاجات افكر فيها واعوز اتكلم فيها

انا هجرب واحاول واطرطش براحتي ....واللي مش عاجبه طرطشتي يروح لعتبة بيته احسنله انا بطرطش عند بيتي...ولا اي؟!؟!؟!

طب اتكلم عن نفسي؟!؟!؟!

مش عارف.......أبدأ بالعيوب اللي شاييفها فيها ...ولا ابدا فراي فالحاجات الحلوه اللي فيا...........انا حر بقا مش عتبة بيتي ...ولا اي؟!؟!؟


هفكر واكتب..........حد عنده ماااااااانع؟!؟!؟

سلااااااااااامو عليكو

هع هع هع..........عاد الرغااااااااااي من جديد للرغي والهلفطه......

نصيب بقا...عملت محاوله كده وعرفت ارجع الباسورد بتاع المدونه بعد مكان ضاع مني

اصل الحكاية اي ببسااااااطه.........الباسورد للمدونه كان هو هو الباسورد لاكونتات تانيه كتير بتاعتي

وبصراحه كان رقم موبايل(بلاش رخامه مش هقول بتاع مين)....المهم.....

ايدي كانت واخده على الرقم اكتبه بسرعه ولما حصل واطريت اغيره من بعض الاكونتات للاسف مبقتش قادر افتكر الرقم تاني

وده اللي سبب مشكله وخلاني مش عارف ادخل كلمة السر تاني.....طبعا حد يقولي طب ما تاخد رقم الموابايل تاني...هقوله ان ده رقم قديييييييييييييييييييم جدا جدا ومبقاش موجود دلوقتي لا هو ولا صحبته...(انا قلت صحبته ولا صاحبه!!!.... غلطه مطبعيه)

المهم......

دلوقتي عملت عملية استعادة كلمة السر وكويس اني كنت لسه فاكر الايميل اللي كنت عامل عليه المدونه ودخلت عليه

وهاااااااااااااااااااااااااااااااااااااااا...................رجعت المدونه من تاني

ان كانت دي اساسا اسمها مدونه ولا ليها علاقة بالتدوين..........ان كنا هنقول ان التدوين هو مجرد كتابه وتعبير عن اللي فدماغنا يعني حبه نفسنه على النت وخلاص...يبقى اانا بكل فخر بكتب مدونه وبنفسن فيها لحد ما هفرقع .....ربنا يستر

العوده للمدونه تاني مرتبطه بظرفين ..واحد حلو والتاني وحش

نبدأ بالوحش... وهو دخول الامتحانات عليه خلاص هانت فاضل شهر...ولاول مره فالتاريخ قررت اني اركز واذاكر بجد واجتهد عشان اجيب تقدير اطلع بيه مره من الكلية اللوز دي فوقت الامتحانات هيديق عليه اوي وبين السفر والقعاد هبقى مكسل اقعد عالنت واكتب حاجه

(ده على اساس اننا مفتقدينك يا غندور ومستنين حكمك ولا حاجه؟!؟!؟....)

اما السبب الحلو بقا..............
.........
..............
................
.................
...................
......................
..........................
....................
..............
..........
......
..
فكل سنه وانتوا طيبين..........


بنحتفل الشهر ده بعيد العمل........

كل مصر واهلها بخير يااااااااااارب


هع هع هع هع هع هع هع هع هع..........سلامو عليكو

انا وكليتي والاجر على الله!!!(1)

دي شويه حااجات ومواقف فالكلية واللي فيها........رحمتك يااااااااارب هي هتبقى ملخبطه ومش مترتبه باوقات معينه غالبا عشان انا بكتبهم الصبح بدري مش هكون فااايق يعني طب وانت ايه اللي مصحيك بدري يا كريزي باشا يا تنك ؟!؟!.... اه سؤال جااااااامد يا راجل...بص اول موقف هيفسرلك انا صاحي بدري ليه........

..................................

كوكو واوا كوكو واوا....
.دي اول كلمة جت على لساني لما المغربي(الي بيسافر معايا مش كل شويه هنقول افهموا بقا!!) اتصل بيا عالتلفون الارضي الساعه 6 الصبح وبيقولي يا بني دا السبت لغينا المحاضرات اللي فيه ومباقش فيه حاجه فعشااااااااان كده مش هنسافر الصبح بقى ونسافر بكره الاحد ولا حاجه......
قلتله ده ليه؟!؟! قالي ليه ايه عادي اتلغت وخلاص.....طيب يا مغربي وقفلت...... وكوكو وااااوا كوكو واااوا كوكو واااااوا

..................................

(يااااادي القرف....ارحمني يارب!!!)
دي كانت اول كلمة نطقتها لما ماما دخلت الاوضه وعماله تصحيني...قوم يابني قوم يلا عشان تلحق تسافر والمنبه اللذيذ عمال يرن ام الرنه الغبيه بتاعته دي تيت تيت تيتتت تيت....
ومش طايل اسكته طبعا دا كان اول يوم فالسنه الدراسيه الجميييييييييله (جدا جدا جداااااا)
لحد دلوقتي مستغرب اني قلت الكلمة دي اول ما فتحت عيني اصلها سبحااااااان الله طلعت عالمقاس بتاع السنه اللوز دي من اولها المهم......
صحينا وجهزنا نفسنا وخرجنا

ومتسألش ليه....
تخرج فمدينة مفيهاش حد بيتحرك قبل الساعه 8 الصبح وبالعااااافيه
والمفروض سعتك تروح لموقف الاتوبيس اللي فااااااخر المدينة عشان تلحق الاتوبيس بدري
ومتسألش ليه.....

الاخوه الافااااضل بتوع المحطة كيف عندهم يطلعوا معاد الصبح ف6 الصبح والدنيا فيها برد يقولك هنطلع اتوبيس مكيف
يعني كتر خيرهم مبيزنقش معاهم يطلعوا الاتوبيس بتكييف الا فالبرد لزوم الدفا بقا واللذي منه.....

يا اخي كفايه اقولك انهم مبيطلعهوش فالصيف واول ما يبدا الشتا
يفتكروا ان في اتوبيسات مكيفه فيقولك الحق طالعها ياعم نلم شويه فلوس من الناس دي
طبعا على اساس ان مفيش كلب من الناس هيفتح بقه ويقول لا مش هركب الاتوبيس ده
واهو والله عندهم حق كله زي الكلب(اااااه كلب بقى) بيروح يدفع تمن التذكره ب7 جنيه
ويركب الاتوبيس وهو عمال يبرطم فبقه وعاملي غضبان ومش عاجبه حال البلد ويقعد يلقح بكام كلمة زي وشه المعفن وكانه كده ياعيني مجبر ومش فايده يعمل حاجه
وهو كلب راضي باللقمه اللي تترميله وبعدين يقعد ينبح لوحده عشان مش عاجباه
بس ميقدرش يقول لا اصله جبان وديله لازق فالارض على طول...
ويطلع يقولك اصل المصريي عالم... ومش عارف ....
كانه جاي من المريخ زياره وهو البريستيج والباقي غلط
انا البشر الكلاب دوووول اكتر حاجه بكرهها مهو يا تكلم وتدافع عن اللي شايفه حقك وتحاول يا تحط لسانك جوه بقك وتسكت ومتوجعش دماغنا بكلام زي وشك....

حتى انا فاكر يوميها كنت واقف فالطابور وكنت طبعا ساكت عشان مبحبش يوم السفر ده
طلع حد كده الله اعلم منين عمال يزعق ويقول ان اللي قدام بيقطعوا تذاكر كتير لناس تانيه وان ده مينفعش وميصحش وعيب
حقه صح؟!؟!؟!؟
بس تقول ايه بقى لما تعرف ان سعته بيتكلم على الوضع اللي بيكون فيه كام زميل راحين الكلية سوا
وبيوقفوا اتنين تلاته منهم وهما اللي يقطعولهم....
يعني بالبلدي بدل ما يقف 6 بني ادمين مثلا فالطابور واحد منهم بيقف ولا اتنين وهما اللي بيقطعوا حسب الوضع
اوقات اللي بيقطع التذاكر يقولك انا اخري اقطع 4 تذاكر للفرد او 3 فيطروا يوقفوا اتنين منهم كده يعني.....
فانا بصيت للراجل ده
وبقوله ((حضرتك دول مبيدوش تذاكر لحد تاني دول مجموعه مع بعضهم وهما لو بيجيبوا تذاكر لناس كده وخلاص مكناش هنسمحلهم بس دول ناس مع بعض ))
فالاخ قام معلي صوته(ده على اساس انه بيحرج حد يعني!!) ويقولك ازاي يعني انا ادي تذكره للي معايا وهو اللي يجبني وانا ما اقفش يعني ما كل واحد يقف فدوره يا جماعه وبلاش الي بيحصل ده
قلتله((حضرتك مفيش حاجه بتحصل الناس بدل ما توقف طابور طويل عالفاضي لموا من نفسهم عشان ينجزوا وميطولوش الوقت عالفاضي))
((لا ياعم كل واحد يقف فدوره))
((يعني عايزهم يقف كل واحد فدوره ...ما هي هي واحد واقف وماسك الفلوس للناس دي....وهي هتفرق ايه يعني واحد يقف ولا المجموعه كلها....ما كده كده التذاكر هتطقطع وانت كده كده مش هتركب الاتوبيس))....

بعدين جه المغربي وقالي خلاص يا احمد كفايه ملكش دعوه ووقف جنبي وعمال يكلمني عشان نبطل رغي مع البني ادم ...ده وخلاص

..................................

(ياختي كاميييييله!!)
والله ما كان قصدي اتريق او اسخر للدرجادي منها
بس الكلمة طلعت مني غلط والله يوميها واحنا فالموقف اول يوم بقى
والبنات الجدد فالكليات لسه راحين وواقفين بقى مع البنات اللي اكبر منهم شغااااالين رغي معاهم
.........دودودوددودودودودودو..........
عمااااالين يسألوا كل شويه عن الكلية والنظام فيها والدكتور الفولاني والاخ العلاني ومش عارف الكتب ايه؟! ولا المكان ايه؟!؟! وهكذا يعني المشكله بقى انهم كانو كتيييييير كانوا بنات كتير اوي
وعمالين طالعين نازلين رغي
واحنا الصبح وواقفين مستنين الغندور بتاع شباك التذاكر
يتكرم ويتعطف ويتناااازل ويفتح الشباك عشان يقطعلنا تذكرة الرحمة والنجاه من النار(اللي تكون نصيب اي غبي فالدنيا دي)
الا وتلاقيلك الاخت اللطيفه دي طلعت بالسؤال الغرررريب ده...

((هو في جنينه فالكلية نقعد فيها فالبريك!!!))

وطبعا بصوتها الناااعم بقا الهاااادي اللي فيه ريحة ثانوي لسه اول ما سمعت السؤال ده.....
((يااااااااااااااختي كمييييييييله)) وطلعت بصوت عااااااالي.....

واذ فجأةً.....بصولي كلهم كده باستعجاب......
انا معملتش حاجه اساسا....بصيتلهو وابتسمت ببلاها(مش بتتقال كده بردك؟!؟!)
وسكت وبس قعدوا بيهمسوا حبه مع بعض كده (مش عااارف هو مش ده موقف في فيلم؟!؟!؟)

وبعدين رجعوا يرغوا تااااااني

دودودودودودودوودودودودودودودود.........
..................................

كفايا كده.........انا هقوم اسافر.......

ربنا يسهل......نكمل الاسبوع القادم............

بس قبل ما نمشي ...شوف الصوره دي دي لوحة كليتنا الجليله..........

ربنا يحميها ويحافظها يااااااااااااااااااااااااارب



طب بذمتك.......بتفكرك بااااااااايه؟!؟!؟!؟

سلامو عليكوا.............